Izikolo zivuliwe ngoLwesibili eZimbabwe abazali bekhala ngokudula kwama-school fees kanti lohulumende laye exwayisa abaphathi ukuthi bengalokothi baxotshe abafundi abayabe behlulekile ukubhadala ngoba lokho kuyikwephula umthetho.
Umabhalane wogatsha lwezemfundo wethule umbiko exwayisa njalo abaphathi bezikolo ukuthi abavunyelwa ukukhweza i-fees yedlule lapho okuhlelwe khona nguhulumende kanye lokuthi kungaphandle komthetho ukubhadalisa abazali ngedola leMelika kuphela.
Wengeze wathi abazali kumele bazikhethele ukuthi babhadala ngayiphi imali esebenza eZimbabwe ngokusemthethweni, okugoqela lona idola leZimbabwe.
Uhulumende uthe abazali akumelanga baphoqwe yizikolo ukuthengela abantwababo ama-yunifomu kulezozikolo kuphela ngoba lokho akukho emthethweni kanye lokuthi akulasikolo esimele sale ukupha abafundi impumela yemihloliso, kungaba ngekaGrade 7, O’ Level kumbe ekaA’ Level ngoba zisithi kabhadalanga imfanelo.
Ukuvulwa kwezikolo kuza ngesikhathi ababalisi, ikakhulu abakunhlanganiso yeARTUZ besithi bafuna iholo labo likhwezwe lisuka kumakhulu amathathu amadola aseMelika lisiya phezu kwenkulungwane, US$1,260, okuyimali uhulumende athi akalayo.
Umphathintambo wezemfundo yePrimary leyeSeconday uMnu Tererayi Moyo yena wethekelele ezinye izikolo eHarare wethula umbiko wokuthi zizilungiselele ukuvikela umkhuhlane weCholera lezizikolo.
Kodwa isiphathamandla senhlanganiso yabahlali eyeHarare Residents Trust uMnu Albert Mazula utshele iStudio 7 ukuthi izikolo ezinengi azilamanzi, okwenza zibesengozini yokuhlaselwa yiCholera.
Your browser doesn’t support HTML5
Ingxoxo loMnu Albert Mazula