Uhulumende weZimbabwe uthi uzama ngamandla wonke ukuthi abongokazi labodokotela bengabaleki elizweni ngenxa yeholo eliphansi lokusebenza nzima ezibhedlela ezingela mithi lokunye.
Amazwi la akhulunywe nguphathintambo wohlangothi lukahulumende lwezempilakahle uDokotela Douglas Mombeshora emhlanganweni wokuhlolisisa udaba lolu owenziwe eHarare izolo. UMombeshora uthe uhulumende usethwele nzima ngokusuka kwabongikazi labodokotela eZimbabwe abahamba kwamanye amazwe ukuyadinga imisebenzi.
Uthe odokotela abafika okuyisilinganiso sokungamatshumi amathathu ekhulwini – 30% sebephumile elizweni.
‘’Sithwele nzima njengohulumende ngenxa yokuba odokotela labomongikazi bethu bayaphuma besiya kwamanye amazwe. Ludubo esizama ukuba silulungise ngokulungisa indawo zabo zokusebenzela, sizama ngazo zonke indlela ukulungisa indubo zabo."
Uphinde wathi uhulumende uyazazi inhlupho abongikazi labodokotela ababhekane lazo ngakho-ke uzasebenza lenhlanganiso ezizimeleyo ukuze zilungiswe.
“Uhulumende kasoze asebenze ezimele kodwa sizasebenza lenhlanganiso ezizimeleyo ukuboba ukuba indubo zabo ziyalungiswa ukuze bengahugwa ukuya kwamanye amazwe.”
Kodwa uDokotela Liberty Shoko osebenza esibhedlela seConcession
uthi bazaqhubekela phambili bedinga imisebenzi kwamanye amazwe uma kungalungiswanga okubahluphayo.
“Thina esikufunayo yimali ukuba ingezelelwe. Okunye lokhu akusoze kusisize ngoba okwenza abantu baye emazweni liholo eliphansi esifisa ngabe bayalingakhelisisa likhuphuke.”
Umongikazi uNkosikazi Chengetai Chivi laye uthi bahlutshwa kakhulu yimali yeholo eliphansi.
‘’Imali esiyiholayo lenkalakatha yomsebenzi esiwenzayo umnengi kakhulu okokuthi asenelisi ukuba sikuqhathanise leholo esiliphiwayo, kumele kulungiswe ukuze lathi sihlale elizweni lethu.”
Inhlanganiso yabodokotela eyeMedical and Dental Practitioners’ Council ithi kulabodokotela abafika phose inkulungwane lengxenye – 1,400 asebephume eZimbabwe kusukela ngomnyaka ka2019 kusiyafika nyakenye. Ithi bonke basuka elizweni ngenxa yeholo eliphansi.
Odokotela abasebenza ezibhedlela zikahulumende bahola amakhulu ayisikhombisa amadollar eMelika – US$700 ngenyanga. Abongikazi bona bahola amakhulu amathathu amadollar eMelika – US$300.
SEE ALSO:
Udaba Esilwethulelwe NguMlondolozi Ndlovu