Uhulumende ubikwa esithi uzaqhubeka encedisa amankampani ngemali yakwamanye amazwe evela ebhanga elikhulu lelizwe eIe Reserve Bank ukuthi enelise ukukhanda impahla ezidingakalayo emafekithali-ama raw materials.
Lokhu kuvezwe ngumphathintambo kahulumende obona ngezamafekithali uMnu. Mangaliso Ndlovu emhlanganweni asanda ukuwuqhuba labosomabhizimusi, lapho agcizelele ukuthi kabasoze babanjwe ngamandla ukuthi behlise intengo yempahla lanxa kufanele bezinuke amakhwapha njengoba abanye babo beyikhuphula mahlayana.
UMnu. Ndlovu uthi kusobala ukuthi inengi alenelisi ukuthenga impahla ezitolo ngenxa yentengo ephezulu, okugcizelelwe nguMnu. Melusi Moyo, isiphathamandla senhlanganiso elwela amalungelo ezakhamizi eyeBulawayo Progressive Residents Association.
UMnu. Dingumuzi Phuthi omela iBulilima West edale lephalamende, engowebandla leZANU PF uthi okwaphuma emhlanganweni wokuhlela uluhlu lwendleko zikahulumende olwe budget kungaphathisa ukuthi impilo yantu ibe ngcono ngomnyaka ozayo.
Lokhu kugcizelelwe ngummeli weMakokoba edale lephalamende uMnu. James Sithole owebandla leMDC.
UMnu. Busisa Moyo, usomabhizimusi ophatheke emhlanganweni loMnu. Mangaliso Ndlovu, ubikwa echasise ukuthi lanxa uhulumende efuna ukuthi osomabhizimusi bakhiqize impahla edingakalayo emafekithali, ama raw materials, badinga imali yakwamanye amazwe ukuze bekwenze lokhu.
Osomabhizimusi bagcizelela ukuthi ukuswelakala kwemali yakwamanye amazwe kungaqedwa yikukhanda impahla zama raw materials elizweni, kodwa lakho kufuna uxhaso ngemali le.
Your browser doesn’t support HTML5
Lalela Loludaba Ngokugcweleyo