Uhulumende uthi uMongameli Emmerson Mnangagwa kasoze ahambe emhlanganweni walonyaka owe-United Nations General Assembly eNew York.
Lokhu kwethulwe nguMnu. George Charamba, umhleli wenhlelo kuhlangothi lwabaphathintambo bakahulumende njalo oyisikhulumeli sikaMnangagwa, othi kuzakuba nzima ukuba uMnangagwa ahambe emhlanganweni lo oqala ngeviki ezayo ngoba ubanjwe ngumsebenzi omnengi kakhulu.
UCharamba uthe uMnangagwa uzamelwa emhlanganweni lo ngumphathintambo kahulumende obona ngokudlelana lamanye amazwe, uMnu. Frederick Shava. Lokhu ngokokuqala ukuba umkhokheli weZimbabwe athume umuntu ukuba ammele emhlanganweni lo.
Owayengumongameli umuyi uRobert Mugabe wangena yonke imihlangano le kusukela ngesikhathi ilizwe lithola uzibuse. Abalandela ezombusazwe bathi kulokuxokozela kubandla leZanu PF ngodaba lokusuka kuka Mnangagwa esikhundleni.
UMnu. Nhlanhla Moses Ncube unobhala jikelele wenhlanganiso yeFreedom Alliance uthi kukhona okutshaya amanzi amnyama kubandla elibusayo.
UMnu. Effie Dlela Ncube okunhlanganiso yeConsumer Rights Association of Zimbabwe uthi akuvamanga ukuba umongameli weZimbabwe engahambi emhlanganweni lo omkhulu.
Kodwa uMnu. Joseph Tshuma omele iPelandaba-Tshabalala edale lephalamende uthi kuyamangalisa osokukhulunywa ngabanye abantu ngodaba lolu.
UMnangagwa ubekhangelelwe ukuba uzakhuluma emhlanganweni lo ngoLwesithathu.
Nyakenye wethula umbiko ekhala ngezijeziso zenotho ezetheswa inkhokheli yebandla leZanu PF ngamazwe entshonalanga. Kusenjalo, umhleli wezindaba wephephandaba leNewsDay, uMnu. Gurthrie Munyuki, uhambe esigodlweni sikamongameli eHarare namuhla lapho axolise ngokulotshwe liphephandaba lakhe elifisele uMnangagwa ukuba alale ngokuthula.
Umbiko lo ubufakwe kuadvertisement obekufiselwa uMnangagwa usuku oluhle lokuzalwa.
SEE ALSO:
Udaba Esilwethulelwe NguGibbs Dube