Uhulumende uyavuma ukuba sikhona isidingo sokuvuselela umnotho welizwe ngokushesha, ibe khona imisebenzi, baqhatshwe abantu ukuze uzulu anelise ukuba lemali yokusebenzisa okungaphathisa ekuthini zehle izehlakalo zokungathembeki lobudlova elizweni njengalokho okuyikho khona okwamanje.
Lokhu kuvezwe ngumsekeli kamphathintambo wezokukhitshwa kwemibiko,umnumzana Supa Mandiwanzira engumhlonotshwa emhlanganweni wentathelizindaba, oqoqwe ngabenhlanganiso ye Zero Tolerance – Wise Consultancy.
Uthi uMandiwanzira, uhulumende, uzimisele ukuqeda udubo lokungathembeki elizweni. Esithi kodwa lokhu angeke akwenza enguye yedwa, kudinga ukuzinikela kukazulu omele laye ehlukane lomkhuba wokuphatheka kikho lokubukela lapho zisenzakala lezi zehlakalo zokungathembeki.
Uqhubeka ethi sekudinga ukuzimisela kukazulu esebenzelana lohulumende, inhlanganiso ezizimeleyo kanye lekhomishini ye Anti-Corruption Commission, ukuluqeda loludubo.
Umqondisi wenhlanganiso ye Zero Tolerance – Wise Consultancy, yena ukhuthaza ezinye enhlanganiso ezinjenge yakhe, ukuba zehlukane lomkhuba wokulwa lohulumende kodwa baxoxisane laye bembonisa lapho okuphosiswa khona lokuphuma lamacebo wokuthi lungaqedwa njani loludubo lokungathembeki elizweni.
Ummeli weZhombe edale lephalamende engowe Zanu PF, umnumzana Daniel Mackenzie Ncube, uthi bona njengenkokheli, bazimisele ukuluqeda loludubo. Uthi udubo yikuba sebayekelwa basabalala okwesikhathi eside endaweni ezinengi zelizwe. Ethi bona njengenkokheli basekela inkulumo kamongameli Mugabe phezu kokuqeda loludubo, wathembisa ukuthatha amanyathelo wokujezisa labo abatholakala belamacala njalo kulobufakazi obanelayo.
EleZimbabwe limanyane lamanye umhlaba wonke ukunanza usuku lwemikhankaso yokuqeda udubo lokungathembeki. Lubikwa selusabalele elizweni, selusesibangeni esiphezulu njalo inkokheli zisithi isimo sesinje ngoba lwayekelelwa okwesikhathi eside.