Uhulumende uthi imbadalo yama-passport isikhwelile isuka kumadola alikhulu alamatshumi amabili, US$120 i-passport ephuma ngemva kwamaviki ambalwa yaya kumadola alikhulu alamatshumi amahlanu, US$150, kuthi ephuma ngemva kwensuku ezintathu ikhwele yaya kuUS$250.
Kugwalo lweGovernment gazette alwethulwe ngoLwesithathu, uhulumende uthe phezu kwalimali, kuleUS$20 ebhadalwayo eyokuthi i-passport yenelise ukungena emitshineni ngokuphangisa, iQuick Response Code.
Kodwa kulomunye otshele iStudio 7 ukuthi wehlulekile ukuthatha i-passport ephuma ngemva kwamaviki ambalwa ngemva kokutshelwa ukuthi kumele abhadale iUS$190, hatshi iUS$150 elotshwe ku-government gazette.
Lanxa kunjalo, kulabathathu abasebenza komsitheli abatshele lumsakazo ukuthi imali ebhadalwayo yiUS$150, okuveza ingxabangxoza ekhona phezu kwaloludaba.
Inhlawulo yama-passport ikhwezwe ngumphathintambo wezemali uMnu Mthuli Ncube ngenyanga edluleyo waseyehlisa kancane ngemva kokukhalakhala kwabantu kodwa watshiya ilokhe iphezulu njalo abanengi besithi abayenelisi.
Abantu abanengi bafuna ama-passport okuyadinga amadlelo aluhlaza kwamanye amazwe ngoba umnotho weZimbabwe uqhubeka usadalala.
Isiphathamandla senhlanganiso elwela amalungelo oluntu eyeMatabeleland Institute for Human Rights uMnu Khumbulani Maphosa utshele iStudio 7 ukuthi inhlawulo ye-passport kumele yehliswe ukuze yeneliswe nguye wonke umuntu ofuna lincwadi.
Your browser doesn’t support HTML5
Ingxoxo loMnu Khumbulani Maphosa