Uhulumende uthi imizamo yakhe yokulwisana le-cholera eZimbabwe isiyehlise ukumemetheka kwalumkhuhlane.
Kodwa enye inhlanganiso esebenza lozulu weHarare, lapho lumkhuhlane obhahe khona kakhulu, ithi ubufakazi balokhu abukhanyi ngoba ingcekeza ephuma ezambuzi ilokhe igeleza ezitaladeni kwamanye amalokitshi kanti lamanzi ahlanzekileyo lawo engatholakali.
Iziphathamandla zikahulumende zitshele intathelizindaba ngoLwesibili ukuthi inhlelo zakhe ezifana lokunika izakhamizi imithi ebulala amagciwane e-cholera emanzini okunatha kanye lemfundiso yokuzivikela kumkhuhlane lo yizo ezenze wadeda.
Uhulumende usungule uhlelo lokujova kumbe ukunathisa uzulu imithi yokuzivikela ku-cholera ekupheleni kwenyanga edluleyo, olwe-oral vaccination program, ebambisane lenhlanganiso yeUNICEF leyeWorld Health Organization njalo uthi uzulu uthathela uhlelo lolu phezulu ngobunengi.
Uthi ukhangelele ukujova abantu abedlula izigidi ezimbili, 2,3 million phansi kwaloluhlelo.
Abantu asebebulewe yi-cholera eZimbabwe kumbe abacatshangelwa ukuthi babulawe yilumkhuhlane sebesedlula amakhulu amahlanu, 501, njalo izolo kubhubhe ababili.
Asebebanjwe yilumkhuhlane kusukela nyakenye sebezinkulungwane ezingatshumi edlula kancane amabili, 22,700.
Sixoxe lesiphathamandla senhlanganiso yeHarare Residents Trust uMnu Albert Mazula, yena othi kusakunengi okumele kwenziwe nguhulumende ukuze umkhuhlane we-cholera wehle okukhanyayo elizweni.
Your browser doesn’t support HTML5
Ingxoxo loMnu Albert Mazula