Uhulumende uthi akukho okuhluphayo kwezombusazwe ngemva kokuxotshwa kwamalunga ebandla leCitizens Coalition for Change edale lephalamende esithi lokhu yikulwisana nje kwabantu bebandla eliphikisayo.
Lokhu kuphume emhlanganweni obuphakathi kosaphethe isikhundla somphathintambo kahulumende obona ngamazwe omhlaba uMnu. Amon Murirwa labameli bezigodlo zeAfrica kwele Zimbabwe.
UMurwira uthi eleZimbabwe lilandela isisekelo sombuso welizwe hatshi ukuba likhahlameza abaphikisayo.
“Lapho ibandla lezombusazwe elilabameli ephalamende ngokufuna kwalo lingacabanga ukukhipha abameli balo ngokufuna kwalo okwesikhatshana kumbe okwesikhathi eside, akula dubo kusisekelo sombuso wethu.”
Uqhubeke esithi kungamanga ukuba abantu abasemajele abebandla eliphikisayo babotshelwa ukuchothoza uhulumende.
Foreign dignitaries meeting with Zimbabwean authorities in Harare on discussing the way forward after the disputed August elections
UMurwira uphinde wathi ukhetho solwedlule kuleli njalo akusoze kube lohulumende womanyano ngoba uzulu weZimbabwe sowakhetha ibandla lakhe.
Omkhulu wabameli beAfrica kuleli engumeli weRwanda, uMnu James Musoni, uthi abakhathazekileyo kabaye emthethwandaba.
“Kumele bakhangela okukusisekelo sombuso welizwe. Bakukhangelisise lokhu ukuze balungise okulakho ukuhlupha."
Umkhokheli webandla leCitizens Coalition for Change, uMnu. Nelson Chamisa, uthi kunengi okuhluphayo kwele Zimbabwe okumele kulungiswe.
Uthi kugoqela ukuxotshiswa edale lephalamende kwamalunga ebandla lakhe okwenziwe nguMnu. Sengezo Tshabangu othi ungunobhala jikelele webandla leCCC.
"Akulani leCCC lokhu. YiZANU PF eyenza lokhu. Kusobala ukuba lokhu okwenzalakala kumalunga ethu ephalamende kwenziwa yi ZANU PF.”
UChamisa uphinde wathi kumele kukhululwe abavalelwe entilongweni abanjengo Mnu. Job Sikhala okuthiwa watshotshozela udlakela.
“Silazo izibotshwa ababotshelwa ezembusazwe. UJob Sikhala, uNgarivhume labe MRP. Kumele bakhululwe."
Uncome okwenziwe yinhlanganiso yeSouthern African Development Community ethi kumele kulungiswe ezokhetho kwele Zimbabwe.
"Kumele kube kutshengisa ukuba indubo zeAfrica ziqedwe ngabantu beAfrica. Okwatshiyo ngabantu ukuba ukhetho lolu aluzange lukhiphe okwakufunwa ngabantu."
Kakhulumanga kangako ngokuqhuba olunye ukhetho eZimbabwe kulandela oluqhutshwe ngoNcwabakazi athi alwenziwanga ngemfanelo.
Ingcitshi kwezombusazwe esebenza lenhlanganiso yeZimbabwe Democracy Institute, uMnu Bekezela Gumbo, uthi iCCC kumele ihlele indlela zokuvikela udubo olufana lalolu abalalo lokuxotshwa kwamalunga alo.
“Akula mthetho oqondisa abantu ukuba amandla okuxotshwa abantu asezandleni zikabani. Kumele kube lesisekelo, kucace ukuba olamandla okuxotsha abantu ngubani."
EleZimbabwe laqhuba ukhetho ngoNcwabakazi lonyaka olwachothozwa yiSADC, European Union kanye leAfrican Union abathi kalwenziwanga ngemfanelo.