Uhulumende uthi kumele ziqakathekiswe ngokufanayo zonke indimi ezibethiweyo kusisekelo sombuso esitsha yikho esesungule uhlelo lwe Capacity Development Program ngenjongo yokuthuthukisa imfundo yababalisi ukuze banelise ukuzifundisa ngokugcweleyo.
Sikhulumanje kubikwa sokula babalisi abangamakhulu amabili asebeqhuba izifundo ze degree lakuqala kuhlangothi lwendimi olwe Linguistics, ekolitshini le Great Zimbabwe, eliseMasvingo, ngendlela yokubathuthukisa ukuze banelise ukuzifundisa ngokugcweleyo lezi ndimi kuqalwa ngezinhlanu ezibalisa olwesi Venda, isiTonga, isiShangaan, isiNambya lesiKalanga.
Umphathintambo wezemfundo yePrimary le Secondary,u Dr Lazarus Dokora utshele umhlangano lentathelizindaba ngokuqakatheka kokuba abantu bakhule besazi ukukhuluma indimi zabo kakhulukazi ngesikhathi besesebancane.
Uthi uDr Dokora kungalesi sizatho ke bekubone kufanele ukuthi balandele isisekelo sombuso esitsha esiqakathekisa indimi ezinengi ezikhulunywa endaweni ezitshiyeneyo zelizwe kuqalwa ngezinhlanu ezibalisa olwesiVenda, Tonga, Shangaan, Nambya lesi Kalanga osekumele zifundiswe ngokugcweleyo ezikolo kuze kuye fika isigaba sikagrade 7.
Uzulu weZimbabwe ukwamukele ngemibono ehlukeneyo lokho okutshiwo ngu Dr Dokora lanxa ekuncoma ngoba kungakaziwa ukuthi kuzaqutshwa njani khona kuvele kulokusilela kwababalisi bolimi lwesiNdebele ezigabeni zeMandebeleni.
Unkosikazi Netsai Chagweda uthi kuluhlelo oluncomekayo lolo oseluqhutshwa nguhulumende kodwa eveza ukwesaba ukuba luzakwehluleka ukuqhutshwa ngendlela ngenxa yokusilela kwababalisi.
Bakhona abafana lomnumzana Simon Moyo wase Warren Park D abatshele i Studio Seven ukuba lanxa kuluhlelo oluhle ma kukhulunywa ngalo,makungabi yindlela yokubamba abantu amehlo ngoba kungamaqhinga abezombusazwe ukwenza bathandwe ngabantu banye abekade bekhala sonkle lesi sikhathi bethi bafuna indimi zabo zifundiswe ngokugcweleyo.
Uthi u Moyo kumele icace injongo kahulumende ekufundiseni lezi ndimi ngoba ukuzifunda nje kuphela kungasizi lutho ethi kumele ube ngumbono oya katshana kube ngeziphathisa ukuphilisa umazifunda, kwenze anelise ukuzisebenzisa kizo zonke ezinye izifundo zakhe okufana lezescience njengalokho esikubona kusenziwa emazweni amanengi ase Asia le Europe.
Umnumzana Moyo uthi kunje ilizwe libhekane lesimo esilusizi lapho lungaqakathekiswa kangako ulimi lweSindebele ezigabeni olufundiswa khona, abazali behlezi bengabakhala kokuphela ukuthi ababalisi abafundisa kungasi bantu abanelisa ukulufundisa lolo limi.
Wengeza ethi kodwa uhulumende ukuthatha lula lokho kukhalaza kukazulu weMandebeleni ngoba engalukhangelisisi ngelihlo elijulileyo ukukhalaza kwabantu ukuba kutshoni njalo kungani bekhalaza ngaleyo ndlela abakuleso sigaba.
Abadabuka ezigabeni lapho kukhulunywa lezi ndimi zonhlanu bebehlezi bengabakhalayo ukuba kazifundiswa lapha ezikolo obekuthiwa kuphazamisa abantwana kakhulu abakuzifundo zakuqala zemfundo ye Primary.