Umholi obona ngezehlakalo kanye lenhlelo zikahulumende esabelweni lesi, uMnumzana Richard Moyo, uthi uhulumende usesungule uhlelo olutsha lokuholiswa kwezakhamizi amabele, okukhangelwe ukuba kuzaqhubeka kuze kuyefika inyanga kaMabasa kumnyak’ozayo.
UMoyo uthioluhlelo lweSiphala Senkosi luzasatshalaliswa izigaba zonke zesabelo anduba lufike eziqintini ezikhokhelwa zinduna zonke zezigaba.
Uthi lokhu kuyimizamo kahulumende yokwehlisa isimo sendlal, eveza ukuba imizi eminengi ikati lilale eziko lokhu kubangelwa yikungani kuhle kwezulu.
UMoyo uthi abohlelo lwesiphala senkosi yilabo abasalela phandle kuhlelo lwe Social Welfare.
“Kulesiphala senkosi esikhangelelwe ukuba nxa kushotile kubonakala ukuthi kulesidingo sokuthi bethole ukudla bayathola through ama chief, ngoba munye ngamunye uzathola five tonne per ward esigabeni sakhe ukuze sivale igap yalabo abayabe besalele,” kuveza uMoyo.
UMoyo uthi eminyakeni eyedlulayo, isiphala senkosi besingelulelwa kunduna zonke, kodwa ngesimo sobubi bendlala le, osobhuku baphiwe umlandu wokuloba wonke ompofu.
Loba lungakasabalali iziqinti zonke, uMoyo uthi amabele la kukhangelelwe ukuba aholiswe izakhamizi ngosabhuku ngesimo sokuba imizi eminengi ilabafelokazi, intandane, abazali ababola ithumbu, abakhubazekileyo, kanye.
UNkosikazi Maggie Mnguni wesiqintini seZhende, eNkayi, uthi ubunzima bukhulu, nanku lohlelo lwesiphala senkosi alukafinyeleli kibo.
“Lapha eZhende kulobunzima obukhulu bendlala. Emasimini kasiphumanga lalutho. Sibi sejodo kalikho okokuthi nxa uNkulunkulu engasangenelanga asazi ukuthi kuzabanjani lezifuyo lazo zizaphela.”
UMnumzana Mlele Sibanda wesiqintini seMenda kusigaba sinye, ukhala ngoxhaso lokugejelwa izibholane ukuze beziphathise.
“Imali kayikho ukuthi kungaze kubekhona okuthengiswayo singakuthola lamuhla, kusasa kungelalutho.m,”kutsho uSibanda.
“Sikhangelela bona abantwana abafundayo ngoba vele kabasayi lezikolweni ngena yendlala, kunzima sibili, sicela inhelo zokusiza zibuye eMenda zixhase lasezifuyweni.”
Phezu kwalokhu, uNkosikazi Pauline Sibanda onguVillage Health Worker eNkayi, esiqintini seMantshololozane, yena ukhala ngokwehla kwesisindo sabantwana abaleminyaka emihlanu ngokuswela ukudla okwakhayo kanye lokwanda kwemikhuhlane ebangelwa yikuswela okuya ethunjini okwakhayo.
Indlala yalonyaka ngokutsho kwabezomkhathi bakuleli, ibangelwe yisikhudumezi okuthi yi-El Nino, esihlasele elizweni lonke lakwamanye amazwe kwehlisa kakhulu isivuno.
Emaphandleni kanye lesemapulazini, amabele atsha engakakhahleli kanye lezinye izilimo zehluleka ukukhula ngokuswelekala kwezulu kanye lokutshisa kwelanga osekutshiye inani labantu elizweni abafika izigidi phose ezilitshumi – nine million zibhekane lendlala emangalisayo, ngokutsho kwenhlanganiso yomanyano wamazwe eyeUnited Nations.
SEE ALSO:
Udaba Esilwethulelwe NguNokuthaba Dlamini