Uhulumende useyekele ukuthengela amalunga edale lephalamende kanye leziphathamandla zakhe izimota waqambula imali engange zigidi ezilitshumi lanhlanu ukuthi isetshenziswe ukulwisana lomkhuhlane weCholera wona osuthethe imphefumulo edlula amatshumi amathathu elizweni.
Phambilini uhulumende ubefake ingcosana nje engatsho lutho ekulwisaneni leCholera enengi imali ivela kumankampani azimele wodwa.
Ngokutsho kukamphathintambo wezemali elizweni, uMnumzana Mthuli Ncube, uhulumende uhle wahambisa limali ekulwisaneni leCholera.
Uhulumende ulohlelo lokuthengela abasanda kukhethwa ukumela uzulu edale lephalamende kanye labaphathintambo, izimota.
Okwesikhatshana bekukhanya engani uhulumende uzaqinisa ikhanda engagqize qhakala ngokuthi uzulu uyakhathazeka ngezinto ezinengi ezigoqela ukuhlaselwa yimikhuhlane.
Abantu abanengi baveze ukulijabulela lelinyathelo.
Omunye wabo nguMnu. Robson Ndlovu othi isikhathi sezimota sizafika okwamanje kumele abantu batholiswe ukudla lesimo selizwe siqale silunge.
“OMP baphiwa izimota, oChief baphiwe izimota, vele ngezani abantu belamba kangaka, abantu bayalamba phela khathesi, khathesi kuleCholera, ezibhedlela akula maphilisi. Hayi kabame sibili ukuphiwa izimota, bazaziphiwa kungaba right sekuNormal lemali sezikhona emaBank.”
Lokhu kusekelwe nguMnu. Mqhele Dlodlo othe akwenzi ukunika abantu izimota ngesikhathi ilizwe lithwele nzima ngokuswelakala kwemali lokunye okufanayo.
Omunye umlawuli kazulu uMnu. Desire Moyo uthe bekuyaba nxele ukuthi abameli bezigaba laba bathengelwe izimota kodwa ilizwe limi ngamazwane.
Uthi loba nje kufanele bazithole lezimota kulokunye okumele kuqakathekiswe ngoba kuphuthuma kulokuhlala kuhle kwabameli.
“Uhlelo lolu lokuthenga imota bekuluhlelo oluqondileyo kakhulu noba kufanele ukuthi bezithole amaMPs lamaMinister izimota zabo, kodwa khathesi bekuyaba nxele kakhulu ngenxa yokuthi kulezinye inhlelo eziphuthumayo ezifana lokulwisana lomkhuhlane weCholera loweTyphoid yona esibhahile elizweni. Loluhlelo beluzakudla imali engange $20 million, kungcono siqale.”
Kusenjalo, lobanje kwamanye amadolobho abantu abaphila ngokuthengisa bexotshwa emigwaqweni, ezitaladeni zakoBulawayo abathengisayo lokhe beqhubekela phambili ngomsebenzi wabo lalapho becetshiswe ukuthi bake bame.
Amapholisa kakhansili lokhe exotshanisana lalabo abathengisayo. Laba abathengisayo babopha inkani lanxa bengadudulwa babuye babuyele lapha abaxotshwe khona.
UMnu. Mbongeni Dube uthi Ikhansili kumele isebenze ibone ukuthi iyaqondisa lokhu ngoba ingubaba ngakho ubaba kumele aqondise abantwabakhe ngokupha lababantu indawo zokuthengisela.
“Mina ngithi laba abantu kumele baphiwe indawo yokusebenzela …”
UMnu. Mthuli Ncube uqale umkhankaso wokubuthanisa imali engaphezu kwezigidi ezingamatshumi ayisithupha - $64 million.
UNcube uthe uhulumende ukhethe ukuthatha lawa amanyathelo ukuze kulungisiswe ezempilakahle phambilini kokuqakathekisa izimota.
Amalunga edale lephalamende kumele anikezwe imota zezinga eliphezulu ezifana le Mercedes-Benz Sedans, Range Rovers lama Toyota Land Cruisers kuthi abasekeli babo banikezwa amaMazda BT50s kanye lama Mercedes-Benz Sedan.
Uhulumende kaMnangagwa ulabaphathintambo abangamatshumi amabili (20), abaphathintambo bezabelo abangatshumi (10) labaphathintambo ababili emahofisini abasekeli bakamongameli umnumzana Constanino Chiwenga lo Mnu Kembo Mohadi.
Uhulumende ukhangelelwe ukusebenzisa imali engangezigidi ezingamatshumi amabili ukuthenga imota zabantu abangamakhulu amathathu lanhlanu (350).
Your browser doesn’t support HTML5
Udaba Esilethulelwe NguBathabile Masuku