Uhulumende uthi izisebenzi zakhe zonke sokumele zihlatshwe ijekiseni yokuvikela umkhuhlane weCovid-19.
Umphathintambo obona ngokwethulwa kwemibiko uNkosikazi Monica Mutsvangwa utshele intathelizindaba ngoLwesibili ukuthi abangahlatshwanga abasoze baholiswe imali eqondane lalumkhuhlane.
Uthe njalo uhulumende useyehlise inani lezisebenzi zakhe ezilokhe zisebenzela amahofisini laya kumatshumi amabili lanhlanu, 25 percent kuphela emizameni yokwenqabela ukumemetheka kweCovid-19.
Imithethwandaba yona isizavulelwa ukudlulisela amacala phambili kuphela, i-remand ngeSingisi.
Ugatsha lwezempilakahle alwethulanga amanani abantu ababanjwe iCoronavirus lababulawe yilumkhuhlane ngoLwesibili.
Inani labadinga ukuhlatshwa ijekiseni yalumkhuhlane lilokhu liqansa kulandela ukuqonga kwenani labatholakala belomkhuhlane lo kanye labafayo.
Ekuqaleni kohlelo lolu, abanye babethikaza, kodwa isimo esisezibhedlela lasemathuneni sesibangele ukuthi abantu basukume ngobunengi bayehlatshwa.
Lanxa ijekiseni le ingavimbi ukubanjwa yiCoronavirus, umuntu ohlatshiweyo ulamathuba amanengi okungabulawa yilumkhuhlane.
Idolobho lakoBulawayo ngelinye lamadolobho alenani eliphezulu lababanjwa leligciwane.
Isiphathamandla senhlanganiso yezakhamizi eyeBulawayo Progressive Residents’ Association, uMnu. Thembelani Dube uthi bakhathazekile kakhulu ngalokhu.
Your browser doesn’t support HTML5
Ingxoxo loMnu Thembelani Dube