Intathelizindaba uHopewell Chin’ono ukhangelelwe ukupha ubufakazi besimo samajele ngoLwesine edale likaMantshi, eHarare kodwa kungavunyelwa intathelizindaba labanye abantu.
UMantshi Whisper Mabhaudi ucele ukuthi uChin’ono aphe ubufakazi ngesimo semajele, kungela ntathelizindaba lozulu edale esithi amazwi azakhulunywa ngu Chin’ono alakho ukuphambanisa ezomvikela zelizwe, izisebenzi zemajele lezibotshwa.
Isicelo sikahulumende lesi siza ngemva kokuba uHopewell eze emthethwandaba le qwetha lakhe uNkosikazi Beatrice Mtetwa yena othi emajele kakulandelwa iziqondiso zokuvikela iCovid 19 ezabekwa ngu hulumende lenhlanganiso yomanyano wamazwe womhlaba eye World Health Organisation.
Esethula lesi sicelo uNkosikazi Mtetwa uthe isisekelo sombuso welizwe sipha uChin’ono imvumo yokuba athonisiswe okusegcekeni esipha ubufakazi bakhe kungela muntu omele avimbe ukuhlonitshwa amalungelo lawa.
Uphinde wathi indlela izinto ezimi ngayo emajele kumele zaziwe ngumuntu wonke ukuze uhulumende alungisise okuhluphayo ukuze abasebenza amajele lezibotshwa bengabi engozini yokuthelelwa ligciwane le Covid-19
Esephendula uMantshi Ngoni Nduna uthe isisekelo sombuso yebo sipha uChin’ono amalungelo kodwa alakho ukuphikiswa nxa ephambanisa ezomvikela welizwe. UChin’ono ubuye edale ebotshwe ngezankosi ezandleni lasenyaweni.
Kusenjalo iqwetha elimela umkhokheli we Transform Zimbabwe uMnu Jacob Ngarivhume uMnu Moses Nkomo uveze ukungajabuliswa yisinqumo sokuthi udaba lwakhe lungathoniswa namhlanje ngoba kungela Mantshi obe ngahlulela.
UChin’ono lo Ngarivhume betheswa icala lokutshotshozela uzulu ukuthi atshengisele okulodlakela mhlaka 31 Ntulikazi besebenzisa inkundla zokuxhumana zebulenjini ezigoqela i- Twitter bezibiza ngokuthi July 31st Movement.
Kolunye udaba abalwela amalungelo oluntu ababotshwa besetheswa icala lokwenza umhlangano elizweni le Maldives ngenhloso yokugenqula uhulumende bakhitshiwe ekubeni yizibotshwa ngeva kokuba uhulumende edlulisele phambili udaba lwabo.
Laba ngabathi uFrank Mpahlo, uMnu George Makoni, uNkosikazi Stabie Dewa, uNkosikazi Rita Nyamupinga, uNkosazana Gamuchirai Mukura, uNkosazana Farai Gumbonzvanda lo Mnu Tatatenda Mombeyarara.
UMakoni uthi kuyathokozisa ukuba udaba lolu kalusekho edale kungelani lokuba beqede isikhathi besiya emadale.
Ukubotshwa kwabalwela amalungelo oluntu laba kanye lo Chin’ono lo Ngarivhume kusolwa kakhulu ngabenhlanganiso ezilwela amalungelo oluntu emhlabeni jikelele abanye besithi sekungcolise isithunzi sika Mongameli Emmerson Mnangagwa.
Your browser doesn’t support HTML5
Udaba lobufakazi besimo semajele obumele buphiwe yintathelizindaba uHopewell Chin'ono