Usomabhimusi uMnu. Mutumwa Mawere obefakelwe umthetho wokungavunyelwa ukuba lebhizimusi eZimbabwe engela mvumo kahulumende uthi loba nje esevunyelwa ukwenza ibhizimusi kusukela ngeviki ephelileyo, amabhizimusi akhe wonke asezandleni zikahulumende womanyano.
Umnu. Mawere utshele iStudio 7 ukuthi kusakhatshana ukuthi athole inotho yakhe yonke njengoba ibanjwe ngumuntu owakhethwa nguhulumende kusetshenziswa umthetho we Recostruction of State-Indebted Insolvent Companies Act.
Umnu. Mawere uthi sokumele abophise uhulumende ukuze athole yonke inotho yakhe.
Abanye abesulwe kuluhlu lokungabi lamabhizimusi elizweni ngusomabhizimusi owake waba ngumsakazi, uMnu. James Makamba owe Telecel Zimbabwe loMnu. John Moxon owe Kingdom Meikles Limited.
Babesetheswa amacala okweba imali ababeyenza kumankampani abo eZimbabwe okwakuthiwa bayifihla emazweni.
Umnu. Brilliant Mhlanga ingcwethi ecubungula ezombusazwe utshele uGibbs Dube we Studio 7 ukuthi amadoda la alakho ukungatholi inotho yabo nxa bengabophisa uhulumende.
