Inkokheli yenhlanganiso ezilwela ilungelo lezisebenzi ithi kayilathemba lembiko ethulwe libandla leZanu PF eyokuthi idale lebandla leli elimqoka eye politburo isivumelane ukwethulwa kwenhlamvu zomthetho wezisebenzi owenqabela ukugunyulwa kwezisbenzi mahlayana.
Isikhulumeli seZanu PF uMnu. Simon Khaya Moyo utshele intathelizindaba izolo ngemva komhlangano wepolitburo ukuthi lelidale livumelane ukuthatha lelinyathelo kodwa kazange atsho ukuthi lumthetho uzethulwa nini.
Ezinye ingcwethi zithi ngabe umongameli Mugbae uyasebenzisa amandla awaphiwa yisisekelo sombuso esule ingxenye yomthetho evumela abaqatshi ukuthi baxotshe izisebenzi nxa ziphiwe inyanga ezintathu zokuzazisa ngalelinyathelo.
Unobhala jikelele wenhlanganiso yezisebenzi, iZimbabwe Congress of Trade Unions, uMnu. Japhet Moyo utshele iStudio Seven ukuthi kabalathemba lokuthi umthetho uzaguqulwa ngoba kade kwakhulunywa ngenguquko lezi.
Izisebenzi zithi uhulumende kumele aguqule umthetho weLabor Act ngokuphangisa ukuze kumiswe ukuxotshwa kwezisebenzi mahlayana ngamankampani okuqale kumaviki amathathu edluleyo.
Lokhu kulandele isinqumo somthethwandaba weSupreme Court esokuthi kuvumelekile emthethweni ukuthi abaqatshi baxotshe izisebenzi zabo nje mahlayana.
Inhlanganiso ezimela izisebenzi zithi izisebenzi esezilahlekelwe yimisebenzi kumaviki amathathu edluleyo zifika phose inkulungwane ezingamatshumi amabili.
Kusenzakala konke lokhu, abanye bathi ibandla leMDC, lona elasungulwa yizisebenzi, likhanya lingelamaqhinga okuvikela izisebenzi.
Ukuhlaziya loludaba sixhume umsekeli wesikhulumeli seMDC-T uNkosazana Thabitha Khumalo lengcwethi kwezombusazwe uMnu Mlamuli Nkomo.
Your browser doesn’t support HTML5
Ingxoxo loNkosikazi Thabitha Khumalo loMnu Mlamuli Nkomo