Ukusebenzelana kwekhansili yakoBulawayo lenhlanganiso ephathisa ngendingeko zokulwisana lomlilo eye Operation Florian yakwele Bhilithani, sokuqalile ukuthela izithelo kulandela ukucitshwa kwemililo masinya osukuphephise imiphefumulo kanye lempahla kazulu lapho kuthe kwaqhamuka umlilo.
Kulandela ukubhidlika kwenotho yelizwe, ikhansili yayisivale inkamba zokulwisa umlilo eNorthend leNketa okwasokwenza kubenzima ukulwisana lomlilo endaweni zonke zedolobho.
Ingcitshi ezalethwa yinhlanganiso yeOperation Florian yakwele Ngilandi, ukuzafundisa izisebenzi zekhansili indlela ezintsha zokulwisana lomlilo lokusebenzisa imitshina emitsha yokwenza lula lumsebenzi seziphathise ukuthi ikhansili yehlise abantu abafa engozini zomlilo kusuka kutshumi ngo2013 kusiya kwababili ngo 2014.
Lanxa inani lemililo ebikwayo linqongile, ikhansili ibisisanelisa ukusukumela phezulu okwehlise impahla elobayo emlilweni isuka phezu kwezigidi ezinhlanu - $5.4 million isiya ngaphezu nje kwesigidi esisodwa samadola - $1.4 million .
Unobhala wekhansili njalo ebambe isikhundla sikamabhalane, uNkosikazi Sikhangele Zhou uthi ikhansili ibisithwala nzima ukucitsha imililo ngesikhathi obesokwenza uzulu alahlekelwe yimphefumulo lempahla ngenxa yokuthi bekungela inkamba ezeneleyo kanye lezimota zokuhambisa.
Uthi kudingakala ukuthi imota yokucitsha umlilo ifike ngemizuzu emihlanu kuphela kodwa besebethatha imizuzu elitshumi lane ngenxa yokusilela kwezimota bafice impahla sokungumlotha nje ngoba umlilo ukhula ngesiphangiphangi.
Lempahla yokugqoka lokuphefumula phakathi komlilo abayitholayo, uthi yenza izisebenzi zanelise ukungena phakathi komlilo ziwucitsha kumbe zikhupha labo abayabe bevalelwe ngumlilo.
Ophethe uhlangothi lwe Fire and Ambulance Service, u Mnumzana Richard Peterson, uthi impahla lemfundiso abayinikwa yiOperation Florian isibatshiye beyinkamba edlula zonke elizweni ngobungcitshi kanye lempahla.
Uqhubeke esithi imitshina kanye lezembatho lezi abazitholayo yizo ezenza benelise ukwehlisa inani labantu abafa emililweni kanye lempahla ebhidlizwa kumililo le.
Isakhamuzi, uNkosikazi Marjorie Penduka, uthi kuqakathekile ukuthi idolobho libe lempahla eneleyo yokulwisana lomlilo ngoba sezinengi ingozi zaloluhlobo ngenxa yezindlu ezinengi esezaba lentambo zamandla ka getsi esezibolile okwenza kubelula ukuthi kuqhamuke imililo.
Uqhubeke esithi imali ehlawulwa yizakhamuzi ayingeke yenelisa ukuthenga impahla yonke kanye lezimota ezidingakalayo ukwenza lumsebenzi ngoba uzulu engela mali ngakho kuyakhwabitheka ukuthola inhlanganiso yokuphathisa uBulawayo ngalumsebenzi.
lnhlanganiso ye Operation Florian yaphathisa okweminyaka emithathu isiza kulelidolobho okwamaviki athile minyaka yonke ukuzaphathisa ngempahla kanye lemfundiso.
Ukubuya kwayo kokucina ngo 2013, inhlanganiso le yeza lemota ezine zokulwisana lomlilo kanye lezinye impahla isengeza phezu kwemota eziyisitshiyagalolunye eyayizilethe kuqala.