Ngqwele Dube
Bulawayo - Lanxa impilo iqhubeka isiba lukhuni ngamandla eZimbabwe, ikakhulu kwabasakhulayo ngenxa yokusilela kwemisebenzi, amantombazana amanengi athi asethole indlela zokuziphilisa lokuphandela izimuli ngemva kokufundiswa imisebezi yezandla phansi kohlelo lukahulumende weMelika olweDreams.
Amaphupho abasakhulayo abanengi aphelela eboyeni njengezithukuthuku zenja kuleli ngenxa yokutshabalala komnotho. Kodwa uhlelo lweDreams, okuyisinciphiso somutsho othi Determined, Resilient, Empowered, AIDS-free, Mentored and Safe, soluwafezile amaphupho amantombazana amanengi ngokuwafundisa imisebenzi yezandla ehlukeneyo efana lokuthunga, ukupheka, ukweluka inwele kanye lokwemba amatshe aligugu.
Omunye wabahlonyiswe yiloluhlelo nguNicole Sibanda, oleminyaka yokuzalwa engamatshumi amabili lambili, 22.
Ngemva kokufundela ukuthunga impahla ngezikhumba, uNicole usungule ibhizimusi lakhe lokuthunga izicathulo esebenzela emkambo omkulu wabenza umsebenzi ofanayo eBulawayo Leather Cluster.
“Ngiyakhona ukuyenza izicathulo ezifika 50 ngenyanga lama bhanti afika 20. Ngyathola imali yokuthenga ukudla endlini lami ngizphilise kodwa akhona amathuba wokuthi ngiyenze imali enengi”
UGosego Mlawuzi laye nguntombazana oleminyaka yokuzalwa engamatshumi amabili lambili, 22, futhi ufundele ukuthunga impahla yezikhumba njengoNicole. UGosego uthi usesenelisa ukuphandela umndeni wakhe esebenzisa imali ayithola ekuthengiseni akuthungayo.
“Sihlala siyi 6 ngekhaya lemali isinginceda lami ukuthi ngincedise njalo ngenelise ukuzithengela impahla yami ngingadinga imali ebafaneni.”
Omunye njalo wabathole usizo phansi kohlelo lweDreams nguHlanzekile Ncube, owafundela ukwemba eZimbabwe School of Mines koBulawayo. Yena uthi lanxa engakatholi umsebenzi okwamanje uziphilisa ngokugebha igolide ezimele.
“Imfundo ngayithola sibili kodwa umsebenzi uyala, ngiyabe ngiyathokoza uma ngingathola umsebenzi okwamanje ngiyahamba ngisiyagebha ngigigise kuphume okuncane engingathenga ngakho isepa.”
Uhlelo lweDreams lusungulwe nguhulumende weMelika ngo2015 ngenjongo yokuhlomisa amantombazana ngolwazi lokuzivikela kugciwane lengculazi lokuthola indlela zokuziphilisa ezifana lamabhizimusi amancane.
UNicole uthi phezu kokufundela ukuthunga, uhlelo lolu lwamfundisa indlela zokuzivikela kumikhuhlane yemacansini.
“Safunda nge HIV prevention, idifference ye Prep lePep lokuthi how do you reduce ama risk okuba le HIV okubanjwa ngumkhuhlane”
Umqondisi wogatsha lweMelika olubona ngokuphathisa abaswelayo emhlabeni jikelele njalo okuyilo oluqhuba uhlelo lweDreams, olweUnited States Agency for International Development, USAID, eZimbabwe, uNkosikazi Janean Davis, utshele iStudio 7 ukuthi sebesebenzise izigidi zamadola eMelika ezingamakhulu amathathu, US$300 million, ukuthuthukisa amantombazana eZimbabwe aphezu kwesigidi, 1 million, aleminyaka ephakathi kwelitshumi lanhlanu, 15, kusiya kwengamatshumi amabili lane, 24, phansi kwaloluhlelo kusukela lusungulwa ngo2015.
Nyakenye loluhlelo lufinyelele amankazana adlula inkulungwane ezingamatshumi ayisikhombisa 70,600, labafana abaphose babe zinkulungwane ezingamatshumi ayisithupha, 57,000, befundiswa ngokujulileyo ngezocansi kanye lokuzivikela emikhuhlaneni.
Lonyaka uNkosikazi Davis uthi sebesebenzise amadola eMelika aphezu kwamatshumi amathathu lantathu, $33.9 million, kuhlelo lweDreams bebambisane logatsha lweU.S. Centers for Disease Control and Prevention (CDC).
Uthi njalo ezigabeni zeZimbabwe lapho okulohlelo lweDreams sebehlise ingozi yokuthelelwa kwamantombazana igciwane leHIV ngesilinganiso samatshumi amane lane ekhulwini, 44 percent.
Uhulumende weMelika uqhuba uhlelo lolu kwamanye amazwe agoqela Eswatini, Kenya, Lesotho, Malawi, Mozambique, South Africa, Tanzania, Uganda, Zambia Botswana, Côte d’Ivoire, Haiti, Rwanda, Namibia leSouth Sudan.
SEE ALSO:
Udaba Esilwethulelwe NguNgqwele Dube