Ukwethekelela eZimbabwe kukamongameli wakweleChina umnumnzana Xi Jinping sekwemukelwe ngendlela ezehlukeneyo yizizalwane zeZimbabwe.
Ukwethekelela kukamongameli Xi Jinping eZimbabwe
Bakhona abathi lokhu kwethekela kuzatshiyela iZimbabwe intuthuko kwezomnotho kanti abanye bathi kuzapha iChina ithuba lokuzitika ngomnotho weZimbabwe.
Lobanje ezinye izizalwane zeZimbabwe sezemukele ngenjabulo ukwethekelela kukamnumnzana Jinping eZimbabwe, abanye bathi lokhu kwethekela kakusoke kuyisize iZimbabwe kwezomnotho.
Umkhokheli wenhlanganiso yeZimbabwe National Chamber of Commerce umnumnzana David Norupiri, utshele iStudio 7 ukuthi kunengi eleZimbabwe elizakuthola kwezomnotho kuloluhambo lukaJinping. Uthi njengoba ehambeni lukaMongameli Mugabe kweleChina kwabhalelwana izivumelwano ezinengi kwezomnotho, kusobala ukuthi kulolu hambo kukhona umnumnzana Jinping azakutshiyela iZimbabwe.
Kodwa isizalwane seZimbabwe unkosazana Nobuhle Maphosa uthi uhlupho yikuthi izivumelwano zingenziwa inengi lamankampani eChina eza lezisebenzi zawo ezivela eChina, okuyinto embi njengoba kungadali imisebenzi elizweni.
Kodwa umphathintambo wogatsha lwezemali umnumnzana Patrick Chinamasa yena uthi kukhulu iZimbabwe ezakuthola kuloluhambo lukamnumnzana Jinping.
Chinamasa
Ngakolunye uhlangothi bakhona abanye abathi iChina yiyo ethola itshontsho elikhulu ebudlelwaneni bayo leZimbabwe. Ingcitshi kwezomnotho umnumnzana Prosper Chitambara yena uthi imbali yobudlelwano beZimbabwe leChina kwezokuthengiselana, ezokusungulwa kwamabhizimusi ikhombisa ukuthi eleChina lizuza okuphindwe kanengi kulalokhu okutholwa yiZimbabwe.
Le yinto egcizelelwa yisizalwane seZimbabwe unkosikazi Ntandoyenkosi Moyo yena othi selokhu iZimbabwe yaxabana lamazwe eEurope isungua ubudlelwano bayo lamazwe eChina, umnotho welizwe ulokhu usiwa kokuphela.
Umnumnzana Jinping ikhangelelwe ukuthi esuka eZimbabwe alubhekise kweleSouth Africa ukuyangena umhlangano weFOCAC, ohlose ukuqinisa ubudlelwano bamazwe eAfrica leleChina.