Inhlanganiso elwela amalungelo ezizalwane zeZimbabwe kweleSouth Africa eye Zimbabwe Community in South Africa ithi iphakathi kokulobela umphathintambo wogatsha lwendaba zasekhaya kweleSouth Africa incwadi idinga impendulo ngezinto ezinengi ezingahambanga kuhle ehlelweni lokuphiwa kwamapermit eZSP.
NgoMvulo umphathintambo Malusi Gigaba wazise ukuthi loluhlelo luzavalwa ngokusemthethweni mhlaka 30 Mpandula kodwa linhlanganiso ithi kusaselemibuzo okufanele iphendulwe lungakavalwa. UBenedict Nhlapho uxoxa lomgcinisihlalo wenhlanganiso yeZimbabwe Community in South Africa umnumnzana Ngqabutho Mabhena.
Umnumnzana Mabhena uthi okwakuqala njengenhlanganiso baletha isibongo esikhulu kakhulu kuhulumende wakwele South Africa ngokupha izinkulungwane zezizalwane zeZimbabwe amapermit eZSP njengoba inengi lalaba bantu yilabo abebeselizweni ngokungekho emthethweni.
Nomakunjalo uMabhena uthi inhlanganiso yakhe iphakathi kokucela umhlangano wesiphangiphangi logatsha lwendaba zasekhaya esithi kunengi abafuna kulungiswe loluhlelo lungakavalwa.
Uthi okwakuqala bafuna ukwazi ukuthi yindaba kuthethe isikhathi eside kangaka ukuthi amapermit aseleyo aphume ngesikhathi njengoba lokhu sekuthwalise abanini bawo nzima.
Bafuna njalo ukwazi ukuthi yindaba kusiba nzima ukuthi la mapermit emukelwe kwezinye indawo.
UMabhena uthi lobanje ugatsha lwendaba zasekhaya seluthembisile ukuthi kuzakhangelisiswa izizatho ezenza ukuthi abedlula izinkulungwane ezilitshumi lambili bawancitshwe la amapermit, inengi lalezo zizatho baphikisana lazo.
Uthi banengi abalamapermit angaphumanga ngesikhathi seDZP ngo 2010, asebencitshwe la amatsha ngokungaphumi kwawakuqala kanti lokho kwakungasimlandu wabo.
Bakhonake abancitshwe ngezizatho zokuthi badala amacala lazo athi kabavumelani lazo. Ezinye ke izizatho uthi bayazemukela.
Ngokutsho kukaMabhena bakhathazekile njalo ngokuphunguka kwenani labafake izicelo zamapermit eZSP eselisuke ku295,000 lalabo abafaka izicelo zama DZP ngo 2010 lehla laya ngaphezudlwana kwe 198,000. Uthike baphakathi kokubhala incwadi bedinga lezi impendulo ukuze kungabi khona ovalelwa phandle kwaloluhlelo kungasimlandu wakhe.
UMabhena uthi inengike lasebethole amapermit la bajabule kakhulu, lobanje sebeqalile ukuhlukumezeka ngokuthi iyozala nkomoni ngo Mpalakazi ka 2017 lapho okuzakuma khona ukusebenza kwamapermit la okungasoke avuselelwe futhi.