UMnu. Donald Trump uzagcotshwa ngoMvulo ukuba ngumongameli weMelika wamatshumi amane lasikhombisa - 47.
Ukubuyela kwakhe embusweni okumangalise abantu abanengi kwenzakala phose ngemva kweminyaka elitshumi waqala ukuguqula ibandla leRepublican Party ngesikhathi kuxokozela kakhulu kwezombusazwe.
UTrump uthi wakhethwa ngendlela engazake ibonakale njalo waphiwa amandla amakhulu ngabantu beMelika.
"Ngifisa ukubonga abantu bonke be Melika ngokungikhetha ukuba ngumongameli wamatshumi amane lasikhombisa njalo lokuba ngjmongameli wamatshumi amane kanhlanu. Ngizalilwela, ngilwele lemuli zenu lakusasa yenu. Ngizalilwela nsukuzonke. Ngamandla ami wonke ngizalwela ukuthi eleMelika libe lilizwe eliqinileyo, elithuthuka kuhle njengalokhu okufiswa yinzalo yezwe leli, okuyikho lokhu elikufunayo."
Ukubuyela embusweni kuka Trump kuveza ukungancengi muntu kwakhe kukho konke akwenzayo. URuss Buettner okuphephandaba leThe New York Post uyalandisa.
"Lapha esikubonayo ngumuntu ozithembayo ocabanga ngendlela ayifunayo."
Intathelizindaba zeNew York Times uRuss Buettner loSuzanne Craig baloba ugwalo olulesihloko esithi ‘Lucky Loser’, oluhlolisisa indlela uTrump azikhukhumeza ngayo esithi unothe kakhulu. UBuettner uyakuchasisa lokhu.
"Kusukela ngama1980s kazange ethembe muntu entweni zonke. Ujavele ukwenza ukuthi umbono wakhe ube yiwo ohamba phambili entweni zonke."
Izakhiwo zonke zika Trump zalotshwa ngamabala amakhulu alombala oligolide, okuveza sobala injongo yakhe empilweni. USusanne Craig wakubona lokhu.
"Wayelesisindo esifika izigidi ezingamakhulu amabili- 200 million uma ekhuluma. Kulengxoxo owake wayenza leTheNew York Times eyabalesisindo samabhiliyoni owayekhuluma khona kudala kuhlelo lwe60 Minutes."
UTrump watshengisa ukuba yintshantshu ekwenzeni ukuthi athakazelelwe ngabantu njalo lezokuthola akufunayo kumabhizimusi.
Kodwa ngasese kunengi okwakumkhathaza. Amankampani akhe avalwa kanenginengi. Kuma casino waphelelwa yimali, lakho kwavalwa.
Waphinda njalo wavuselela umsebenzi wakhe ngokubangumlingisi kumabonakude kuhlelo lweThe Apprentice lapho ayezibambe esidukwini.
"Bomama labobaba sengincintisa kukhetho lukamongameli weMelika ukwenzela ukwakha Ilizwe elilohlonzi."
UTrump ongaxolisi muntu njalo othanda ukulahla umlomo waxabanisa abantu abanengi elwela uzulu.
"Uma eleMexico liletha abantu lapha, kalilethi abakhaliphikeyo. Baletha izidakamizwa, ubudlova, abadlwengulayo njalo, engxenye, labalungileyo."
Engumongameli wakhetha abehluleli abathathu abangena edale leSupreme Court abagenqula isinqumo sokukhutshwa kwezisu.
Ekuqaleni komnyaka ka2020 kwaqhamuka umkhuhlane weCOVID19 owanyikinya amandla kaTrump. Wasebenza gadalala ukuze kudingwe amajekiseni okuvikela uzulu kumkhuhlane lo. Wake wabika ukuba kulabazama ukulungisa umuthi wokuwatsha ama-bleach alakho ukwenqabela ukumemetheka kwegciwane leli.
NgoLwezi ngesikhathi kulabantu abafika phose izigidi ezilitshumi – 9 million abalegciwane leCOVID19 labedlula inkulungwane ezingamakhulu amabili – 230,000 abasebebulewe ngumkhuhlane lo, abantu bavotela uJoe Biden kukhetho.
Esesukile embusweni, uTrump wabhekana lamacala amanengi okwenza ukuba atholakale elecala kwelinye. Kodwa lokhu kwamenza wathakazelelwa ngabantu abanengi njalo waphinda waphepha engozini yokudutshulwa. UPam Smith ohlala eEvans City esabelweni sePennyslvania ngomunye wabalandeli bakhe.
"UMlimu ulezimiso zika Trump. Okunengi kwamceza ngenxa yezizatho ezithize. Ngethemba elikhulu kumbe ngokokuthi abengumongameli wamatshumi amane lasikhombisa, 47."
Ezombusazwe sezaguqulwa nguTrump selokhu wangena kukho. Indoda eyaloba ugwalo olulesihloko esith ‘The Art of the Comeback’ usephendukile njalo esikhundleni sikamongameli
Udaba lolu lolotshwe nguTina Trinh eseNew York