Owake waba ngummeli weZimbabwe kwamanye amazwe engomunye wabalwa impi yenkululeko uDr Kotsho Lloyd Dube kasekho. uDr Dube obeseleminyaka engamatshyumi ayisikhombisa lathoba munwe munye-79 ubhubhele ebuthongweni emzini wakhe eKhumalo koBulawayo izolo ekuseni.
Umuyi owaba ngomunye wababumba iqula lebandla lePF Zapu enkulumeni zeLancaster House eNgilandi, wammela leli bandla ngesikhathi sempi, enhlanganisweni yomanyano wamazwe womhlaba eye United Nations leMelika phakathi kweminyaka u1965 kusiya ku1972. Wazommela njalo leli bandla emazweni abalisa iBhilithani, amazwe awe Scandinavia kanye lawe ntshonalanga yeEurope.
Kusukela ngesikhathi ilizwe lithola uzibuse waphatha izikhundla ezehlukeneyo ebandleni leZapu okugoqela esokubona ngokwethulwa kwemibiko njengoba wake waba ngumhleli njalo wamaphephandaba wonke awe PF Zapu kwele Zambia. Waba njalo kuqula kunkulumo zomanyano phakathi kwebandla lakhe leleZanu PF ngo1988 lakuhulumende lenhlanganisweni ezehlukeneyo zikahulumende okubalisa ukuba ngumsekeli kamgcinisihlalo weBoard yomsakazo weZBC.
Phakathi kuka 1990 kusiya ku1996 waba ngummeli weZimbabwe emazweni abalisa iFrance, Spain, Portugal, Vatican Kanye lenhlanganisweni ye UNESCO. Kuthike phakathi kuka 2002 kusiya ku2006 waba ngummeli welizwe kwele Nigeria okweminyaka emibili wazommela njalo ilizwe kweleZambia okweminye iminyaka emibili.
Umuyi utshiye umkakhe unkosikazi Agatha Dube, abantwana abathathu kanye labazukulu abathathu. Abantu babuthene esililweni emzini wakhe kunumber 35 George Avenue, eKhumalo koBulawayo.