Isiphathamandla senhlanganiso ye Premier Soccer League uKennedy Ndebele usekhuthaze abalandeli bomdlalo wenguqu ukuba bengaphatheki kuzehlakalo zobudlwangudlwangu ngoba ziphazamisa ingqubela phambili eyomdlalo wenguqu kwele Zimbabwe.
Ehlaziya isizini yomdlalo wenguqu kusigaba sePSL ngomnyaka ka 2015 uNdebele uthe imidlalo idlalwe kuhle kakhulu loba nje kube khona amaphutha lapha lalaphaya.
“Isizini ka 2015 ihambe kuhle kakhulu loba nje kulezinye izinto ezilutshwane esizazama ukuthi sincedisane lamaqembu ukuthi sizilungise kuhle ikakhulu ekuhlelweni kwemidlalo. Lizakhumbula ukuba kube lomdlalo ongasadlalangwa obukumele ube phakathi kwe How Mine le Caps United.
Lokhu kwasiphatha kubi kakhulu ngoba kusigaba esikuso asikhangeleli ukuba kube lento enjalo yikho sithemba ukuba kwaba ngokwakuqala njalo kwaba ngokokucina.
Okunye okwakhathazayo zinkundla zokudlalela ngoba kuke kwaba lemidlalo emibili edluliselwe phambili obekumele idlalelwe enkundleni yeAscot. Yikho kuzamele sikhulumisane labo masipala ukuba belungise inkundla kungabi lezehlakalo lapho okuthiwa umdlalo awusekho ngoba enkundleni kugcwele amanzi,” kutsho uNdebele.
Eminyakeni edluleyo intshantshu zePSL bezisazakala ngosuku lokucina lwemidlalo kodwa lonyaka iqembu le Chicken Inn linqobe kusasele umdlalo owodwa ukuba imidlalo iyefika komlindi uyacina.
Ngaphansi kwengalane kodwa kuze kwacaca ngosuku lokucina ukuba yiwaphi amaqembu agunyulwe kusigaba saphezulu njalo lawa ngagoqela amathathu abekade evele edlala kusigaba sangaphansi ese Division One ngomnyaka ka 2014.
UNdebele uthi lokhu kutshengisa ukuba imidlalo ye PSL ikuzinga laphezulu njalo waveza ithemba lokuba amaqembu avela kuDivision One asezancintisa ngcono lawo njengoba kusukela lonyaka kuzabe sekugunyulwa amaqembu amabili kuphela kusigaba saphezulu hatshi amane.
“Khonokho ukuthi kucine kuphuma ezintathu kutshengisa ukuba kulebanga elikhulu phakathi kwamaqembu adlala kuPSL kanye lamaqembu adlala ku Division One.
Ngithemba ukuthi nxa sisiya phambili sizakuba lamaqembu azathi nxa efika lawo enze ukuba kube lomncintiswano ku Premier Soccer League,” kutsho uNdebele.
UNdebele ukhuthaze abalandeli bomdlalo wenguqu ukuba betshiyane lomkhuba wobudlwangudlwangu ngoba lezizenzo zibisela emuva umdlalo wenguqu.
Uqhubekele phambili wathi abantu kumele bezwisise ukuba labo abasekela ngemali kabathokozi nxa kulobudlwangudlwangu ngoba lokhu kungcolisa amabizo amankampani abo.
“Nxa kulobudlwangudlwangu labo abasisekelayo ngemali bakuthola kungekho kuhle ukuthi basebenzisane lathi. Ngakho isicelo sethu yikuthi abantu bekuzwisise ukuthi nxa silabantu abasisekelayo ngemali langezinye indlela bayabe bekhangelele ukuba into abasekela ngayo ibukeke bethole umvuzo wokuba abantu bethenge lokho abakuthengisayo ngoba bekubone kusenzakala ngendlela enhle ebholeni,” kuchasisa uNdebele.
UNdebele uthi bakhangelele ukuba labo abasebenzisana labo bazayala belokhu bephathisana labo langomnyaka ka 2016 njalo kulabanye futhi abakhulumisana labo ukuze labo bengene besize ngosekelo lwemali.
“Njenge PSL inhlelo zethu zihlala zihlelekile, njalo labo esisebenza labo bayasikhuthaza ukuba silungisise lapho abayabe belensolo khona.
Silezivumelwano zethu esilazo le Castle Lager, iChibuku, silethemba lokuthi iEasycall layo iyabe ikhona, bakhona abe Supersport bona abenza ukuba imidlalo yethu ibonakale endaweni ezinengi.
Kulabanye njalo esingeke sibabethe ngamagama ngoba sisaxoxisana kodwa kuyathembisa ukuba bengaba ngabangane bethu,” kutsho uNdebele.
Kuke kwaba lemibiko ebisithi inkampani ye SuperSport ibisithandabuza ukuyasebenzela enkundleni ye Barbourfields ngemva kokuba kube lezehlakalo zobudlwangudlwangu emdlalweni obuphakathi kweqembu le Tsholotsho lele Dynamos.
UNdebele uthi kungumlandu kazulu ukuba azise amapholisa ngalabo abaphatheka kumisebenzi yodlakela enkundleni.
“Abantu kumele bezinuke amakhwapha ngoba kuyayangisa uthi elizweni kuthiwe kuleyinye indawo engasahambi icamera angathi kuseSyria, akukuhle khonokho” kutsho uNdebele.
Amaqembu amatsha avela kusigaba se Division One azadlala kuPSL ngomnyaka ozayo ngathi ele Bulawayo City, ele Mutare City, ele Ngezi Platinum kanye lele Border Strikers.
Lawo agunyulwe kusigaba saphezulu ngathi ele Dongo Sawmill, ele Flame Lily, ele Whawha kanye lele Buffaloes.