WASHINGTON —
Omele iBulilima edale lephalamende uMnu. Dingumuzi Phuthi osuse udaba lwakhe edale leHigh Court ngoLwesibili lapho aphikisa okwethulwe ngumthethwandaba lo othi kumele kwenziwe ukhetho olutsha esigabeni lesi, usephanyeke udaba lolu edale le-Electoral Court.
Igqwetha lika Phuthi, uMnu. Nqobizitha Ndlovu utshele umsakazo weStudio 7 ukuba bafake udaba lolu edale le-Electoral Court ngoba luhambelana lezokhetho.
Kafisanga ukukhuluma okunengi ngodaba lolu. UPhuthi, ongumsekeli womphathintambo kahulumende obona ngezobulembu beInternet lokunye, walile ukukhuluma lomsakazo weStudio 7.
UNkosikazi Bekezela Maplanka webandla leCitizens Coalition for Change, owanqotshwa nguPhuthi eBulilima, uthi bakhangelele ukuba bazanqoba emthethwandaba.