Umsekeli kamphathintambo wezemfundo usikhwicamfundo Paul Mavhima uthi kuyonale iviki uzakhokhela iqula elizadingisisa ngodaba lokuthi kulababalisi abanengi abangenelisi ukukhuluma ulimi lwesiNdebele ezigabeni zeMatabeleland, ababikwa kuyibo ababangela ukuthi abantwana, ikakhulu abaqhuba imfundo ephansi bengaphumeleli ezifundweni zabo.
Ababalisi, abezombusazwe, abalwela ilungelo luluntu, kanye labantu makhaza sebekhulume ngazwi linye ngaloludaba, njalo bagcizelela ukuthi ilizwe linanze indimi zonke ezikhulunywa elizweni ngokusemthethweni.
Kubikwa kulezikolo eMatabeleland South esezifundisa ulimi lwesiShona kuphela ngoba kungelababalisi abangafundisa isiNdebele. Izikolo lezi zigoqela iMthwakazi, Mpalawani, Gwamanyanga, Mpopoti, le Zhabazha Primary Schools.
UMnu. Andrew Langa, omela i-Insiza North edale lephalamende ugcizelele lesisehlakalo kodwa wathi indawo lezi ziseduzane leMberengwa lapho okuvelwe kukhulunywa ulimi lwesiShona njalo lolimi lwesiNdebele lalo luyafundiswa.
Isisekelo sombuso esitsha selizwe sithi kufanele ilizwe linanze indimi zonke ezikhulunywa elizweni ngokusemthethweni, hatshi isiShona lesiNdebele kuphela.
Ukuze sihlaziye loludaba, uSithandekile Mhlanga weStudio 7 uxoxe loMnu. Rejoice Ngwenya, yena ogcizelela ukuthi ukwakha amakolitshi akuncedi njalo kumele abafundela umsebenzi wokuba ngababalisi beqeqetshe ukufundela indimi ezimbalwa.
Your browser doesn’t support HTML5
Ingxoxo LoMnu. Rejoice Ngwenya