Kuhlelo lwethu lwamasiko lokuphila kwabantu nsukuzonke lamuhla sixoxa ngesinqumo esiyethulwe ngumthethwandaba wedale leConstitutional Court esith akusamelanga bantwana bathathe kumbe bathathwe bengakabi leminyaka elitshumi lasitshiyangalo mbili – 18.
Abesifazane ababili abenda bebancane - uLoveness Mudzuru and Ruvimbo Tsopodzwa, bafaka udaba lolu emthethwandaba bekhonona ngokuthi umntwana akumelanga athathe kumbe athathwe engakafikisi iminyaka leyo.
Uzulu uthakazelele isinqumo lesi kodwa kukhanya engani kuzabanzima ukuthi kulandelwe isinqumo lesi. Ukuze sihlaziye udaba lolu, akesizwe uGibbs Dube weStudio 7 exoxa ngodaba lolu loNkosazana Stars Mathe Thebe loMfundisi Useni Sibanda owenhlanganiso ye Zimbabwe Institute for Social Tranformation.
UMathe Thebe uthi: “Umthetho ungezwa kuthiwa sungumthetho uyabe uvele ezandleni zabantu. Kunzima ukuthi singathi abantwana abasoze bathandane bengakafikisi iminyaka yona leyo ngoba baqala ukukhula kathesi bebancane abantwana. Bayakhula bathombe bebancane abantwana bajahe abafana bebancane abantwana.”
Uthi njalo nxa omunye engazithwala eleminyaka engako uzahle ayeyenda ngoba eselesisu.
UMfundisi Sibanda uthi abantwana abanengi abacina betshada bengaphansi kweminyaka engavunyelwa ngumthethwandaba kutsho ukuthi abanengi bayabe bengakacabangi kuhle njalo lesi kuyabe kuyisikhathi sokuthi babe seikolweni.
“Mbonaangani yinto eqakathekileyo leyo ukuthi umntwana kuyabe esaqalisa ukuthi azilungiselele impilo yakhe yakusasa.
UMathe Thebe uthi njengoba lokhu sekungumthetho kuzamele kufundiswe ezikolo ukuze bebekwazi ukuthi akumelanga ukuthi bathandane bengakenelisi iminyaka esemthethweni.
“Kodwa ngicabangela ukuthi vele esikolo kuvelwe kuyafundiswa lokhu abantwana beleminyaka engaphansi kwetshumi lasitshiyagolombili. Nxa sikhangelele endaweni zomkhuhlane wengculaza kulalokhu okuthiwa bengahlangani emacansini, I abstinence,” kutsho uMathe Thebe.
Wengezelele wathi intombi ekadeni ibikhula ize ithombe ingakakhombi.
UMfundisi Sibanda uthi kumele inhlanganiso ezizimeleyo zingene ebantwini zibafundise ngaloludaba.
Your browser doesn’t support HTML5
Ingxoxo loNkosikazi Stars Mathe Thebe loMfundisi Useni Sibanda