Ucwaningo olusanda kwenziwa yinhlanganiso yeAfrobarometer ibambisana leye Mass Public Opinion Institute luveza ukuba abantu abayisilinganiso sokwedlula amatshumi ayisitshiyangalombili ekhulwini – 85% bafuna ukuba lohulumende okhululekileyo. Inengi labo abafuni uhulumende okhokhelwa nguntando kayiphikiswa kumbe ibutho.
Uphenyo lolu olwethulwe koBulawayo yinhlanganiso yeMass Public Opinion Institute okwabuzwa abantu abedlula kancane inkulungwane – 1,200 lwaqhutshwa ngoNhlangula lonyaka.
Abaphendula imibuzo ngesikhathi sophenyo lolu bakubeka sobala ukuba kabakuthandi ukubuswa ngamandla, ukuba kube lebandla elilodwa njalo lohulumende okhokhelwa libutho.
Abahlala emadolobheni banengi abangafisi ukubuswa nguntando kayiphikiswa, ibutho kumbe libandla elilodwa uma kuqathaniswa labasemaphandleni.
Uphenyo lolu luveze njalo ukuba abantu abayisilinganiso sokungamatshumi amahlanu lasithupha ekhulwnini - 56 percent bathi akulambuso kazulu eZimbabwe kuthi abangamatshumi amathathu ekhulwini – 30% bathi kulombuso kazulu kodwa obhekane lemigoqo embalwa.
Mass Public Opinion Institute presenting Afrobarometer survey results
Umqondisi wezocwaningo kunhlanganiso yeMass Public Opinion Institute, uNkosikazi Simangele Moyo-Nyele, uthi abantu abanengi bafisa ukuba kube lohulumende kazulu eZimbabwe.
"Ucwaningo lolu siliphathe sikhangela ilanga lombuso kazulu ubukhona kuthange.
Okuhle yikuthi abantu baphatheke kucwaningo beveza obala ukuba bafuna umbuso kazulu njalo abafuni kubuswa ngumuntu kodwa bafuna ukuzibusa."
Olwela amalungelo oluntu uMnu. Themba Chiveya uthi ucwaningo lolu luqakathekile.
"Lobanje uzulu ekhathazekile ngokwenzakal ezweni, umbono wakhe uyacaca ukuthi uguna umbuso kazulu."
UNkosazana Sukoluhle Mhlanga okhubazekileyo uthi impumela yocwaningo lolu ilemfundiso ejulileyo.
Mass Public Opinion Institute presenting Afrobarometer survey results
"Sikhangelele ukuba kunhlelo ezilandelayo lapho bephatha ucwaningo babelocwaningo olucacayo olungabandlululi abantu abakhubazekileyo."
Umbalisi ekolitshini yemfundo yaphezulu eMidlands State University, uNkosikazi Ntombizile Moyo-Nyoni, uthi abeAfrobarometer leMass Public Opinion Institute sekumele baguqule indlela abaphatha ngayo ucwaningo.
"Kuqakatgekile ukuba kunhlalo ezila delayo zocwaningo iMpoi leAfro Barometer bajule kakhulu kuhlelo lokuthapha ulwazi ukuze obalalyo angasali elemibuzo."
UMnu. Claud Phuthi, oqondisa inhlelo kunhlanganiso yezakhamizi eyeBulawayo Progressive Residents Association, uthi kubavule amehlo okwethulwe yiAfrobarometer.
"Siphume sifumbethe okunengi lapha lamhla je, sifunde ukuba izulu ufuna umbuso kazulu lokuthula kuhlanganiisa lenhlelo zokuzibusa."
Omele iPelandaba-Tshabalala edale lephalamende ekubandla leZanu PF, uMnu. Joseph Tshuma, uthi kulombuso kazulu eZimbabwe.
"Thina eZimbabwe uhulumende wethu kalancindezelo silombuso kazulu okhululekileyo."
AbeMass Public Opinion Institute, abavame ukwenza uphenyo eZimbabwe lakwamanye amazwe, bathi bengathola isikhathi bazaqhuba ucwaningo emaphandleni. Okwamanje bathi benza lokhu koBulawayo leHarare. Kuphenyo olusanda kwenziwa eZimbabwe, abantu abafika amatshumi amahlanu ekhulwini bathi abasuthiseki ngendlela umbuso kazulu ophathwa ngayo eZimbabwe njalo inengi labantu kabazi lutho ngokuguquka komkhathi kodwa bazi kakhulu ngokuthathwa kwezidakamizwa.