Umsekeli kamongameli uRetired General Constantino Chiwenga uthi odokotela abakhalale umsebenzi bephula umthetho ngakho-ke bamiswe umsebenzi okwesikhatshana ukwenzela ukubajezisa ngalokhu abakwenzileyo.
UChiwenga wethule lokhu namuhla eHarare ngesikhathi ekhuluma labameli bamadokotela la njalo leziphathamandla zenkampani yeNatpharm ethenga amaphilisi lemitshina esetshenziswa ezibhedlela zikahulumende.
Odokotela esikhulume labo bathe uhulumende kakhulumi iqiniso ngokumele kusetshenziswe ezibhedlela. Bathe amaphilisi abawatshengiswe yiNatpharm sokwadlula isikhathi sokuwasebenzisa ngakho-ke akukho okutsha okuthengwe nguhulumende.
Odokotela abakhalala umsebenzi bafuna ukuthi uhulumende athenge imitshina, amaphilisi lokunye okumele kusetshenziswe ezibhedlela, bahlawulwe iholo ngamadola hatshi ama bond notes lama RTGS lokunye okunenginengi. Bathi ababuyeli emsebenzini nxa uhulumende engalungisanga konke abakufunayo.
Umthethwandaba weLabour Court usanda kwethula isinqumo sokuthi odokotela bakhalala umsebenzi okungekho emthethweni.
Ingcwethi kwezempilakahle uDokotela Elophi Sibanda uthi kumele uhulumende alungise inhlupho zabodokotela ngemfanelo hatshi ukubethusela.
Your browser doesn’t support HTML5
'Uhulumende Kakhulumisane Labodokotela Ngokukhalala Umsebenzi Hatshi Ukubethusela'