Umphathintambo wezemali umnumzana Patrick Chinamasa utshele intathelizindaba ukuba lokhe sise sibangeni esiphezulu isikwelede selizwe njengoba sesifika phose amabillion alitshumi amadollar – US$9,9 billion.
Limali uChinamasa uthi yizikwelede ezigoqela ezakwamanye amazwe laphakathi kwelizwe, okuyisimo asichaze njengenye yembangela enza eleZimbabwe lehluleke ukuthola olunye usizo lwezikwelede enhlanganiweni zomhlaba.
Uqhubeke ethi sekudinga ukuba uhulumende lengatsha zakhe kumele adinge indlela eziqotho angazisebenzisa ukubuyisela ilizwe kusimo sokuthi libe ngelithembekileyo kulabo abaphathisa ngezimali okuzanceda ukuhuga osomabhizimusi abafisa ukuzasungula amankampani kuleli.
I Studio Seven ikhulumisane lezakhamizi ze Harare ukuzwa imicabango yazo phezu kodaba lwesikwelede selizwe kanye lokusungulwa kwale hofisi ezaqondisa umsebenzi wokusiqeda.
Umnumzana Jackson Nyoni utshengise ukudana okukhulu phezu kwalesi simo sesikwelede esesikhule safika phose amabillion alitshumi.Uthi uNyoni lalowo mcabango,wokusungulwa kwehofisi le uzakuba yize ngoba ethi ngabantu banye bonalabo abehluleke ukulondoloza imali yesikhwama sikahulumende, abanye bentshontsha abanye betshaphaza ngemisebenzi yokungathembeki eye corruption.
Uqhubeke ethi into uzulu afuna ukuyibona yikulondolozwa kwemali yezikwelede isebenze okuyikho eyathathelwa khona hatshi ukube lokhe kukhulunywa nje wona umonakalo uqhubekela phambili. Uthi akusayi kuba lula kulabo abafisa ukusekelwa nguhulumende ukuze bathole izikwelede zakwamanye amazwe lamabhanga.
UChinamasa uthi sekuzamele kube yihofisi kamphathintambo wezemali ezabona ukuba sikhona na isidingo sokuba ithathwe na imali edingwa zingatsha zikahulumende loba amankampani hatshi lokho obekusenzakala ukuba uhulumende umane azwe sekuyisikwelede engazi ukuthi sivelele ngaphi. Ethi njalo uzakusekela ukuthathwa kwezikwelede ezizaphathisa ukuthuthukisa ilizwe ezinjengokwakha imigwaqo, indaba zokutholisa uzulu amanzi ahlanzekileyo kanye lamandla kagetsi.