U-Bulawayo uveza ukukhathazeka ngokuqhubeka kohlupho lokusilela kwemali emabhanga kanye lendwendwe ezinde zabantu abatshona belayinele ukuthola imali emabhanga. '
Abantu bathi lezi nhlupho lezinye seziqhelisa umkhuba omubi, wenkohlakalo emsebenzini wemali kanye lokuthengiswa kwemali emkambo wensitha.
Abamavinkili labo bakhala ngokuthi sebesehluleka ukuqhuba kuhle umsebenzi ngoba bebhekane lodubo lokuswela imali ezincane zemali yeMelika ukuba baphe abantu intshintshi.
Phezu kokungatholakali lula kwemali emabhanga akoBulawayo leyo egcinelwa kumakhalekhukhwini eyeEcocash layo kayisebenzi kahle emavinkilini amanengi, osekutshiye inengi labantu lisebunzimeni ngesikhathi ilizwe libhekane lokulwisana kokusabalala kweCOVID-19.
Isakhamuzi sakoBulawayo uNkosikazi Cora Ndebele uthi ukutshona belayinele imali kufaka impilo yabo engozini.
“Uhlupho lwemali emabhanga luqhubekela phambili inkulungwane esiyiphiwa ebhanga ngelanga incane kakhulu, yenza ukuba abantu bavukele emabhanga malanga onke njalo amavinkili athatha imali yebulenjini amabalwa futhi kuyadula kungcono ukufolela imali emabhanga ilanga litshisa kwenza lokumemetheka kweCovid kubelula ngabe uhulumende uyangenela.”
Umnu Njabulo Moyo uthi ukuswelakala kwemali kudala ukuqansa kwentengo yempahla lokumemetheka kweCovid-19.
“Ukuswelakala kwemali emabhanga kudala ukuba abantu bamemethekise iCovid-19 ngoba abalandeli iziqondiso zempilakahle.Okwesibili kudala ukuqansa kwentengo yempahla emavinkilini lezimota zokugada ngoba kudingangala imali mathupha ekugadeni lekuthengeni ezinye impahla.”
Usomabhizimusi osakhulayo, uMnu Michael Ndiweni uthi uhulumende kathathe amanyathelo.
“Indwendwe ezisemabhanga yikuswelakala kwemali njalo Lbantu abasebenza emabhanga bathatha isikhathi sabo kodwa imali iyasilela ngabe uhulumende ufaka imali ezinkulu.”
Olwela amalungelo oluntu, engumabhalane wenhlananiso yeIbhetshu likaZulu, uMnu Mbuso Fuzwayo uthi lokhu kubonisa ukwehluleka kukahulumende.
“Ukusilela kwemali emabhanga kuveza ukwehluleka kukahulumende ngoba evalele yonke imali emoyeni bazama ukuyincindezela kodwa imali ayikho uyehluleka akuthembisi ukuthi kukhona okuzasiza abantu ngoba imali ayitholakali kuzamemethekisa umkhuhlane weCovid-19 ngoba abantu batshona befolele imali emabhanga.”
Ngesikhathi kusungulwa umkhambo wokuthenga lokuthengisa imali yakwamanye amazwe osemthethweni owe Foreign Exchange Auction, oqondiswa ngabebhanga elikhulu lelizwe eleReserve Bank of Zimbabwe-RBZ, umphathintambo wezemali, uMnu Mthuli Ncube uthembise uzulu ukuba usezakwenelisa ukuthola imali lula emabhanga njalo udubo lokusilela kwemali seluzahle luphele duu elizweni. Kodwa udubo lolu lokhu luqhubekela phambili, lendwendwe emabhanga lemagalajini sekuyinhlalayenza, ingcwethi zezempilakahle zisithi lokhu kufaka uzulu engozini yokuthelelana lula igcikwane leCovid-19, lona elikhanya ngalezi nsuku selihlasela uBulawayo ukwedlula amanye amadolobho.