Ugatsha lwezempilakahle kuhulumende weZimbabwe lwethule isaziso sokuthi sokulomuntu wakuqala wakoBulawayo otholakale elegcikwane leCoronavirus, ohle wabulawa yiwo ngemva kwensuku ezithile elaliswe esibhedlela salelo dolobho kungakaziwa ukuthi ulalo.
Owesilisa, obeleminyaka engamatshumi ayisikhombisa lathoba munwemunye yokuzalwa -79, ubikwa eqale ukuzwa inhlungu esifubeni ekhwehlela mhlaka 23 Mbimbitho waya kudokothela wakhe. Ubikwa eqhubeke ethatha imithi ayeyiphiwe ngudokothela kodwa umkhuhlane waqhubeka umkhulela wacina ethwalelwa esibhedlela ngoLwesine mhlaka 2 Mabasa.
Mhlaka 4 Mabasa, 2020, ngoMgqibelo odluleyo usiwe kuhlangothi lwesibhedlela olwabagula kakhulu olweIntensive Care Unit, okulapho acine etshona khona ngosuku lunye.
Elethwa esibhedlela ubikwa etshilo ukuba uke wethekelela endaweni ethakazalelwa yizethekeli eyeHwange kusukela mhlaka 14 kusiya mhlaka 16 Mbimbitho okulapho angabe wathelelwa leli gcikwane.