Abenhlanganiso elwela amalungelo oluntu, eye Women In Leadership Development-WILD, iphathe umhlangano ngoLwesine, wabesifazane abaphatheke kwezombusazwe, wokuhlaziya umthetho osanda kupasiswa edale lephalamende eleHouse of Assembly leleSenate, wokuguqula isisekelo sombuso welizwe, okwesibili, iConstitutional Amendment Bill Number 2.
Abesifazana abangene lumhlangano baveze imibono ehlukeneyo ngakhoke inengi livumelene ukuthi balakho ukumelana lalinguquko ngokukhweza loludaba emthethwandaba waphezulu welizwe oweConstitutional Court. Abangasekeli linguquko bathi iyabalulaza njalo kuzaletha ingxabano enkulu ezweni lakumabandla ehlukeneyo ezombusazwe.
Abesifazana bakoBulawayo abaphatheke kwezombusazwe
Obona ngokuqhutshwa kwenhlelo eZimbabwe Lawyers for Human Rights uNkosikazi Prisca Dube uchaza injongo yomhlangano walamhlanje.
"Besihlangene labomama, abasakhulayo lozulu sihlaziya uConstitutional Amendment 2 ukuthi umumetheni lokuthi yini esingayenza kuminyaka elitshumi elandelayo ukuthi sisebenze siphume lamasu ukubona ukuthi mhlawumbe singafika ku 50/50 kukhetho oluzalandela kuminyaka elitshumi elandelayo."
UNkosikazi Dube uqhubeke ethi lokhu sekungumthetho okhona kodwa ulakho ukuphikiswa emthetwandaba waphezulu oweConstitutional Court.
"Lo usungumthetho okhona osulinde ukusayinwa nguMongameli osumele uhlonitshwe ngazo indlela zonke kodwa uma ungumthetho otshiya okunye ulakho ukuganjelwa ukuze uhambelane lesisekelo. OMama bengabonakala bezinkokhekheli kodwa kumele labo bangene kumgwazo lo ukuze babonakale ukuthi bazinkokheli uqobo."
Osakhulayo uPamela Mpofu ongene umhlangano walamuhla uthi isisekelo esitsha sibatshiya phandle.
"Mina umbono wami yikuthi thina abasakhulayo abangamankazana silelungelo lokuphiwa ukumelwa edale lephalamende kodwa okwamanje omama abakhona abasimeli njengamankazana asakhulayo ngoba kukhona okuthile esiyabe sifuna ukuba idale lisisebenzele khona."
UNkosikazi Sithabile Mlilo okwezombusazwe uthi kukhona okuhle lokubi ngalesisisekelo esesiphekwe kutsha.
"Isisekelo lesi sasimele sehlukaniswe, sikhangela kubomama ukuba babemele behlukanise izinto banike 66, kodwa thina sikhangelele i50/50 njengoba isisekelo 17 asithabanga thina njengabomama."
Omunye ongene lumhlangano uNkosazana Lezina Mohhamed okhangelele ukuphatheka kukhetho oluzayo njengoKhansila ngomunye wabangavumelani lalinguquko yesisekelo sombuso.
"Asivumelani loAmmendment 2 ngoba thina njengabomama isivalela phandle kakhulu kumele thina njengabomama silwise ukuze isisekelo sombuso silandelwe."
I-Zimbabwe iphakathi kokuguqula isisekelo sombuso uConstitutional Amendment Number 2, oselinde ukusayinwa nguMongameli Emmerson Mnangagwa kumalanga alandelayo ngemva kokuvotelwa wapasiswa edale leHouse of Assembly leleSenate.
Phansi kweziqondiso zale iBill inani lamalunga amela abesifazana labasakhulayo liyengezwa okwenza linguquko isekelwe ngabanye. Kube labanye njalo abathi singaguqulwa njani lesi sisekelo sombuso, singazange saqala ukusebenza lokhu salotshwayo ngomnyaka ka2013, kodwa sesihle sifakwa izigamba, singakaqondisi imithetho eminengi yelizwe eminye yayo eyayikhona ilizwe lingakatholi uzibuse.