Ubudlelwano phakathi kweMelika leleZimbabwe abukhangelelwanga ukuguquka lanxa nje sokukhethwe ummeli omutsha ongonsundu, kutsho ingcwethi ezicubungula ezombusazwe.
Ingcwethi lezi zithi ukukhethwa kommeli omutsha weMelika onsundu, uAmbassador Harry Thomas Jr, akusoze kuguqule ubudlelwano bamazwe la, ngoba vele iMelika iguqula abantu hatshi izimiso kanye lenjongo yayo emazweni la.
Amazwe la womabili ubudlelwano bawo, lokhu baphazamiseka eminyakeni engaphezu kwelitshumi edluleyo eleMelika lisola uhulumende waweZimbabwe ngokungahloniphi amalungelo oluntu, indlela okwabiwa ngayo umhlabathi kanye lokungaqhutshwa kuhle kokhetho lokudinga umongameli kanye lamalunga edale lephalamende.
Ocubungula ezokubuswa kwelizwe, uMnumzana Useni Sibanda, uthi ubudlelwano bamazwe la buphuma esigodlweni eWashington khona eWhite House, kungakho abusoze buguquke ngenxa yomuntu osebuyile kodwa buzaqhubeka njengokuthi bebuvele bunjani.
Kumele kunanzelelwe ukuthi lapho ummeli lo esethulwa, wakhuluma ngokunyamalala kukaMnumzana Itai Dzamara, athi kuveza ukuthi laye uzaqhubeka ngokunqineka ngamalungelo oluntu kanye lendlela uhulumende wakuleli aphatha ngayo izizalwane.
Uqhubeke esithi lanxa kunjalo, likhona ithemba ngoba kunyanga ezisanda kudlula amazwe asentshonalanga athsengisa ukuncibilika lokudinga ukukhumisana umlotha leHarare okungabe kuyinjongo yokuletha ummeli onsundu. Ethi sesiside isikhathi lokhu amazwe la afungelana ijoyi lamakhala abomvu, osokumele ukuthi kukhulunyiswane kudlelwane njalo.
Osakhulayo njalo eyisifundi kwezokubuswa lokudlelana kwamazwe, uNkosazana Emily Mpofu, uthi umbala kammeli awulani lembono yakhe yelizwe lakuleli ngoba okuqakathekileyo yikuthi ngummeli weMelika omumethe okudingwa yilelo lizwe kungelani lombala wakhe. Izwekazi leAfrica, uthi lafunda isifundo ngomongameli uMnumzana Barack Obama, ukuthi izizalwane zemelika ziqakathekisa ilizwe zalo kanye lalokho okulilungeleyo hatshi ubala womuntu kumbe imbali yokuthi wazalelwa ngaphi komhlaba.
Ilizwe leMelika lihlezi ligcizelela ukuqakatheka kokunanzwa kwamalungelo oluntu okwenza laze labeka umthetho we Zimbabwe Democracy and Economic Recovery Act ngo 2001 ukuthi mhlawumbe uhulumende wakuleli angaguqula isiphatho sakhe kuzulu kanye lakwabaphikisayo kwezombusazwe.
Elakuleli lihlezi lingenela eleMelika lisithi okwalapha ngokwalapha, iMelika mayingangeneli ezakomakhelwane lanxa nje kunyanga ezidluleyo zokwaba labanye abaphathintambo kuhulumende abakhanya belesifiso sokuvuselela ubudlelwano obuqakathekileyo.