Ibandla lePeople’s Democratic Party (PDP) ligqibe umhlangano walo omkhulu ngoLwesihlanu eHarare ngokukhetha uMnu Tendai Biti ukuthi abe ngumkhokheli walo esekelwa nguMnu Samuel Sipepa Nkomo.
Umgcinisihlalo walelibandla nguNkosikazi Licia Matibenga njalo umsekeli wakhe nguMnu Watchy Sibanda.
Unobhala jikelele nguMnu Gorden Moyo esekelwa nguMnu Tongai Matutu; umphathisikhwama nguMnu Benison Ntini njalo umsekeli wakhe nguMnu Julius Magarangoma.
Obona ngokuqoqwa kwenhlelo zalelibandla nguMnu Solomon Madzore; isikhulumeli nguMnu Jacob Mafume njelo umsekeli wakhe nguMnu George Mkhwananzi.
Ibandla leli, ebelisaziwa ngokuthi yiMDC Renewal, lihlephuke kuMDC-T nyakenye ngemva kokuxabana kwamalunga alo loMnu Morgan Tsvangirai phezu kobukhokheli bakhe.
Ekhuluma ngemva kokukhethwa kwakhe uBiti utshele intathelizindaba ukuthi ibandla lakhe lizasebenza gadalala likhulumisane lamanye amabandla aphikisayo kubunjwe umanyano ozasusa ibandla leZanu PF embusweni.
Wengeze wathi osokudingeka yikuthi abantu bahlanganise amakhanda kudingwe amaqhinga okuhlenga ilizwe ebunzimeni eliphakathi kwabo.
Bakhona ekade bekhonona ngendlela inkokheli ekhethwe ngayo, ikakhulu abavele ezigabeni ezibalisa iManicaland, Masvingo lezigaba zonke zontathu zeMatabeleland.
I-PDP yethule uhlelo lwayo ethi luqondane lokuvuselwa komnotho olweHolistic Program for Economic Change (HOPE) lolukhangelane lezombusazwe kanye lokhetho olweAgenda for the Restoration and Rehabilitation of the Electoral Sustainability (ARREST).
Kodwa ezinye ingcwethi ezicubungula ezombusazwe ezigoqela uMnu Mlamuli Nkomo zithi kaziboni lisenelisa ukuthola usekelo oluqinileyo kuzulu lelibandla.
Your browser doesn’t support HTML5
Ingxoxo loMnu Mlamuli Nkomo