UMongameli weMelika uMnu. Joe Biden uthi okwamenza waphuma kukhetho oluzaqhutshwa lonyaka ngoLwezi yikuthi sokumele kungene osakhulayo esikhundleni somkhokheli welizwe ozavimba ukubhidlizwa kombuso kazulu.
Kumbiko wakhe owokwazisa uzulu ukuthi kungani wathatha isinqumo sokungancintisi kukhetho, uBiden okhulume lozulu enkundleni zokuxhumana esesigodlweni sika mongameli eWhite House, uthe sokuyisikhathi sokuthi adedele omunye.
“Sengithethe isinqumo sokudedela omunye, yiyo yodwa indlela yokubambanisa ilizwe lethu.”
UBiden wakhetha ukuba umsekeli wakhe uNkosikazi Kamala Harris ancintisane loMnu. Donald Trump owebandla lama Republcians kukhetho oluzayo.
Kulabanye abambalwa abafisa ukungena kumncintiswano lo abakubandla lama Democrats. Abakubandla lama Republicans bafuna ukuba uBiden asuke esikhundleni ngesiphangiphangi besithi useluphele okokuthi kasakwazi akwenzayo. Abakubandla lama Democrats bayakuphika lokhu.
Abalandela ezombusazwe abadabuka eZimbabwe abahlala eMelika balemibono etshiyeneyo ngodaba lolu. Sixoxe loMnu. Tim Muringai ngokwethulwe nguBiden izolo eWhite House yena othe isinqumo sikaBiden siveze ubukhokheli boqotho.
Omunye njalo odabuka eZimbabwe olandela udaba lolu nguMnu. Washington Jamela othe uBiden esethula umbiko wakhe ubezwakala ukuba kaqinanga emzimbeni kulandela ukuhlaselwa ngumkhuhlane weCOVID kunsukwana ezedluleyo.
Kukhangelelwe ukuba ibandla lama Democrats lizakwenza umhlangano omkhulu oweDemocratic National Convention okuzakhethwa okusemthethweni ozamela ibandla leli kukhetho oluzayo. Elama Republicans lisanda kukhetha uTrump othi nguye ozwenze uBiden waphuma kukhetho oluzayo.
Uqhube umhlangano eNorth Carolina ngoLwesithathu lapho athe, “Njengoba lisazi kumalanga amathathu edluleyo sanqoba umongameli welizwe ongaqhubanga kuhle ukwedlula abanye uJoe Biden khathesi sekulomunye esizamkhalisa, olamanga kakhulu, uKamala Harris- ongumsekeli kamongameli ongaqhubanga kuhle ukwedlula bonke kumbali yeleMelika.”
Abantu abanengi bathi bakhangelele ukuba uTrump loKamala bazangqikilana kukhetho oluzayo.
SEE ALSO: Udaba esilwethulelwa nguTaboka Ncube