UMongameli Joe Biden wakwele Melika uthi kumele kumiswe impi ephakathi kwele Israel lele Lebanon, leyaqhamuka nyakenye phakathi kwe-Hamas lele Israel lezinye.
UBiden, owethule amazwi la ngoLwesibili emhlanganweni omkhulu owe-United Nations General Assembly eNew York, uthe kumele njalo kumiswe impi ephakathi kwabalwayo kwele Sudan laleyo ephakathi kwele Ukraine lele Russia.
Uthe impi lezi zibulalisa abantu abanengi kube labanye ababhidlizelwa imizi okwenza ukuthi abanye babo bayephephela kwamanye amazwe.
Amazwi akhe asekelwe nguAnu. António Guterres, unobhala jikelele we-United Nations, otshele umhlangano lo ukuba kulenkokheli yamanye amazwe eyephula ilungelo loluntu njalo etshotshozela udlakela.
Uthe lokhu kubisela amazwe wonke emuva ngakho-ke umhlaba ungeke waqhubekela phambili kulezimpi zomvukela lezinye okuhlaselwa khona amanye amazwe njengalokhu okwenzakala kwele Sudan, Somalia, Lebanon, Gaza, Israel, Ukraine lamanye.
Ekhuluma emhlanganweni lo, uMongameli wakwele South Africa ukhulume kabanzi ngokufiswa lizwekazi leAfrica elithi kumele linikwe isihlalo kuhlangothi lwezomvikela olwe-United Nations Security Council.
Lokhu kugcizelelwe nguMongameli William Ruto wakwele Kenya laye olesifiso esifanayo.
EleMelika lisekela ukuba izwekazi leAfrica libe yingxenye yohlangothi lolu epheleleyo.
Okwamanje kulamazwe athuthukileyo wodwa akuhlangothi lolu.
URamaphosa uthi amazwe la enza umathanda emhlabeni wonke jikelele ngoba alamandla okuqala lokumisa izimpi lokunye.