Mhlaka 19 Nhlangula eleMelika lilekhefu elaziwa ngokuthi yi-Juneteenth, okulusuku lapho okwamiswa khona ubugqili kulelilizwe ngomnyaka ka 1865. Kumkhankaso walonyaka owokhetho lukamongameli weleMelika bonke uJoe Biden loDonald Trump badinga usekelo lwabansundu ngalolusuku.
UMongameli Joe Biden uphathe umkhosi wokuhlabela kunanzwa ikhefu leJuneteenth esigodlweni se White House.
“Imbali yethu ayigxilanga endulo kuphela, ikhangela njalo okwenzakala namuhla lakusasa. Ukuthi ikusasa leMelika ngelomuntu wonke hatshi abalutshwane.”
UBiden uthe aphikisana labo kwezombusazwe bazama ukuguqula imbali yelizwe.
"Yizipoko zakudala ezizama ukusibisela emuva. Bavimba inkululeko yenu, besenza kubenzima ukuthi abansundu bavote, kumbe ukuthi ivoti yabo ilethe umahluko. Bevimba amathuba njalo behlasela ukutshiyana kwabantu, amathuba lokuphatheka kwabo.”
Umkhankaso kaDonald Trump wabumba iqembu labansundu elimsekelayo ele "Black Americans for Trump" ngoMgqibelo ngesikhathi ezama ukufinyelela abamnyama kweyinye inkonzo yeMichigan.
"Yindawo eqakathekileyo kithi. Sesenze okunengi, ngiyaziqhenya ngalokhu, ngoba sesithuthukise abansundu ukwedlula abakhokheli bonke ababuya ngemva kuka Abraham Lincoln. Ngumbiko omkhulu lowu."
Uthe abavoti abansundu balahlekelwa yimisebenzi ngenxa yalabo athe, “ngabokuza abangekho emthethweni abayizigidi lezigidi.”
“Isigaba sinye ngasinye silomngcele. Lakuzwa lokhu. Kodwa bayangena endaweni zenu njalo bathatha imisebenzi yenu. Baphazamisa abansundu beMelika kanye labohlobo lweSpanish."
UTrump uthi izigaba zabansundu zilinyazwa yikwanda kobugebengu phansi kukaBiden.
"Ukudalwa kwamacala kuvame kakhulu lapha lakwezinye izigaba zabansundu, njalo abanengi nxa behlangana lami, bathi badinga ukuvikelwa. Sifuna amapholisa asivikele. Asifuni kutshontshelwa, ukutshaywa kumbe ukubulawa ngoba sifuna ukukhululeka ukuhamba emigwaqweni sisiyathenga isinkwa. "
Imibiko yohlangothi lweFBI iveza ukuthi inani lamacala odlakela lehlile elizweni kugoqela amadolobho amancane Kanye lamakhulu.
UBiden uthi abavoti abansundu yibo abenza wakhethwa kukhetho olwedluleyo njalo udinga usizo lwabo njalo.
"Ngenxa yokuba abansundu beMelika bavota, mina loKamala singumongameli lomsekeli kamongameli weMelika namuhlanje, kungenxa yenu lokhu. Alisilo haba. Ngoba lavota, uDonald Trump ngowayengumongameli onqotshiweyo. Njalo ngevoti yenu, ngevoti yenu kumnyaka ka 2024, sizakwenza ukuthi uDonald Trump anqotshwe njalo."
Kukhetho olwedluleyo, abavoti abansundu abayisilinganiso sokuyisitshiyangalombili ekhulwini kuphela bakhetha uTrump.
Ucwaningo lwePew Research polling luthi umkhankaso walonyaka uveza ukuthi abavoti abansundu abayisilinganiso sokulitshumi lasitshiyangalombili ekhulwini, 18% basekela uTrump, okulinani elilakho ukuletha umahluko ezigabeni ezingathathi cele ezigoqela i Michigan.
Udaba lolu luqoqwe nguScott Stearns, Intathelizindaba yeVOA, lalwethulelwa nguTaboka Ncube oweStudio7.
SEE ALSO: Lalela Okugcweleyo Ngaloludaba