Izigidi lezigidi zezizalwane zeMelika zizavota kusasa zikhetha uMongameli omutsha phakathi kukaMnu Donald Trump loMnu Joe Biden.
UTrump umela ibandla lamaRepublicans kuthi uBiden yena ngowebandla eliphikisayo elamaDemocrats.
Uzulu uzakhetha njalo amalunga edale lephalamende, eleCongress kwezinye indawo.
Izolo uMongameli Trump uqhube imikhankaso yokudinga usekelo endaweni ezifana leIowa, Michigan, Georgia, Florida, North Carolina kuthi uBiden yena ubekhankasa ePennsylvania.
Ekutshoneni kwelanga izolo besokuvote abantu abangu92 million ngohlelo oluvumela ukuvota ilanga lokhetho lingakafiki, olwe-early voting.
Uphenyo olwenziwa zinhlanganiso ezitshiyeneyo, luveza uBiden enguye okhokhelayo ngemiklomelo kulolukhetho.
“Thina i-tradition yethu, amaDemorats, yikuthi sivota masinya. So sesavota ngoba asimeleli, sihle sihambe sihle sivote masinyane khonapho,” kutsho umsekeli wamaDemocrats uMnu Raphael Mthombeni.
“Ngaleyondlela ngibona angani nxa sikhangela abunengi babantu asebevotile, ngilokusuthiseka okukhulu ukuthi njengoba kuyithi esihamba kuqala ngibona angathi sizanqoba.”
Your browser doesn’t support HTML5
Ingxoxo loMnu Raphael Mthombeni
Kodwa umsekeli webandla lamaRepublicans uMnu Tamuka Gwatidzo uthe uTrump nguye ozanqoba ngesilinganiso esikhulu.
“Udaba lokuthi uMnu Joe Biden uyakhokhela, ungakhangela kukhetho luka2016, uzabona ukuthi intathelizindaba zidlala ngengqondo zabantu ngokukhankasela uBiden. Zizama ukunyampisa amaRepublicans inhliziyo ukuze engayivota esecabanga ukuthi asenqotshiwe kudala. Ngo2016 bathi uTrump wayengasoze anqobe, kodwa wanqoba,” kutsho uMnu Gwatidzo.
“Engikubonayo yikuthi uTrump uzanqoba ngamavoti amanengi kulolukhetho ngoba sathi sivota ngo2016 sasingakwazi ukuthi uTrump uzakuba ngumkhokheli onjani. Khathesi sesimazi njalo kunengi asekwenzele ilizwe okufana lokusungula imisebenzi.”
Your browser doesn’t support HTML5
Ingxoxo loMnu Tamuka Gwatidzo