Abezindaba abeAssociated Press babika ukuba uBenjani Mwaruwari osuswe yiZIFA ethics committee kukhetho lukamongameli wenhlanganiso le enganikwanga izizatho ezikhanyayo, uthi uzaphanyeka udaba lolu emthethwandaba.
UBenjani owadlalela iManchester City, Portsmouth, Sunderland leBlackburn emidlalweni yengugu kwelebhilithani uthi kakwazi ukuba iZIFA isuse njani igama lakhe phakathi kwalabo abafisa ukuncintisa kukhetho lolu kunyanga ezayo.
Abanye abavinjwe yikhomithi le nguProphet Walter Magaya, uTemba Mliswa loFarai Jere. UMliswa laye uthi ulakho ukuphanyeka udaba lolu emthethwandaba. Kasenelisanga ukukhuluma leziphathamandla zeZIFA ngodaba lolu ngoba bebengaphenduli omakhalekhukhwini.
Ingcwethi kwezemidlalo uThandazani Zimbwa uthi bonke abasuswe kukhetho lolu balelungelo lokuphanyeka udaba lolu emthethwandaba.
Uthi kulakho ukuba ukhetho lolu kalusoze luqhutshwe ngoZibandlela ngenxa yesinqumo esilakho ukuthathwa ngumthethwandaba kudaba oluzaphanyekwa nguMwaruwari loMliswa.
SEE ALSO:
Ingxoxo Esiyenze loThandazani Zimbwa