Umkhokheli wakwele Israel uMnu. Benjamin Netanyahu uthi kabasoze bekhumisane umlotha leHamas ngoba yona kakhulu elizweni lakhe mhlaka 7 Mfumfu.
UNetanyahu utshele abezindaba abeReuters leAssociated Press namuhla ukuthi uyakuzwa okucelwa ngabanye abantu abafika ukuba bebeka phansi izikhali ukuze kuhlengwe abathunjwa yiHamas njalo kuvikelwe abantwana lasebekhulile.
UNetanyahu uthi okwamanje kulempi ezaqhubekela phambili baze behlule iHamas.
Ugcizelele esithi ibutho lakhe selikhulule omunye wabo owathunjwa kulandela ukuhlasela okwenziwa yiHamas.
Kusenjalo iHamas yethule ivideo yabesifazana abathathu abathi uNetanyahu wehluleka ukubavikela ngakho-ke kumele ibutho lime ukuhlasela eGaza Strip ukwenzela ukuba bekhululwe.
Abathathu laba bakhala ngokunganakekelwa ngele Israel eselibulele abantu abafika phose inkulungwane ezilitshumi – 8,000 eGaza Strip, abagoqela abantwana.
Kulafika phose inkulungwane lengxenye – 1,405 ababulawa yiHamas ekuqaleni kuka Mfumfu kwele Israel.
EleIsrael selihlasela eGaza ngebutho langendizamtshina ezithwala imibhobho. NgoMvulo libhombe phansi kwesibhedlela esikhulu eGaza lapho elicabangela ukuba kuchathame iHamas.
Kudaba elifanayo, uMongameli Joseph Biden wakwele Melika usekhuthaze uNetanyahu ukuba avikele uzulu njalo avumele abathwala ukudla, imithi, amanzi lokunye ukuthi bengene eGaza Strip.
Wethule amazwi la ngesikhathi amazwe omhlaba wonke jikelele ekhuthaza ukuthi kuphathiswe abantu abalimeleyo labaladilizelwe imizi yabo.
Inhlanganiso elwela amalungelo abantwana eyeSave the Children yona ithi inani labantwana abafileyo eGaza kumaviki amathathu edluleyo selisedlula inani labantwana abafayo ngomnyaka emhlabeni wonke jikelele endaweni ezilempi kusukesela ngomnyaka ka2019.
Kubikwa kulabantwana abedlula inkulungwane ezintathu asebefile empini ephakathi kwele-Israel leHamas.
Inengi labantu lithi kumele kumiswe impi le elakho ukumemetheka emazweni akukwekazi leMiddle East. Inhlanganiso yomhlaba wonke eyeUnited Nations iqhuba umhlangano wesiphangiphansi kwele Melika lapho edinga ukuba kwenziwe isinqumo sokumisa impi le.
Ekhuluma leStudio7, ingcwethi kwezokulima njalo engumqondisi wenkampani yezokulima eyeGreen Afrique Technologies, uMnu Angliston Sibanda, ukhuthaze amazwe alamandla ukuthi angenele akhuthaze ukukhumisana umlotha, hatshi ukupha amacele womabili izikhali.