Owayengumongameli wakwele Melika uMnu. Barack Obama lomkakhe uMichele Obama bathi umsekeli kamongameli uNkosikazi Kamala Harris uzalahla phansi uMnu. Donald Trump kukhetho lukamongameli oluzaqhutshwa ngoLwezi lonyaka.
Ababili laba bethule lokhu emhlanganweni weDemocratic National Convention oqhubekela phambili eChicago. UObama uthe eleMelika lifuna ukuba lohulumende kazulu hatshi okantandokayiphikiswa.
Democratic National Convention (DNC) in Chicago
“EleMelika selilungiselele isahluko esitsha, imbali entsha. Sesilungiselele ukuthi uKamala Harris abengumongameli. UKamala kasoze akhangele indubo zakhe njengo Trump, uzabhekana lendubo zenu. Njengomongameli akasoze asebenzele ababebandla lakhe kuphela kodwa uzasebenzela iMelika yonke, ungumkhokheli woqotho,” kutsho uMnu Obama.
Ekhuluma emhlanganweni lo, uNkosikazi Obama okhulume okukhalise abanye abalandeli bebandla leDemocratic Party, uthe umuntu wonke kumele akhankasele ukuba uNkosikazi Harris anqobe kukhetho oluzayo.
UNkosikazi Obama uthe, “asingeke siqede isikhathi sizidla ingqondo ngokuthi ilizwe lizakhetha umkhokheli onjengoKamala na? Kumele senze konke okusemandleni ethu ukuthi akhethwe.”
Abakubandla leDemocratic Party sebevumelane ukuba uHarris kumele amele lelibandla kukhetho oluzayo. UNkosikazi Harris usemelele ukwamukela okwethulwe libandla leli ukuba ancintise kukhetho oluzayo. Ukhangelelwe ukuba uzakwenza lokhu ngoLwesine.
Election 2024 DNC Photo Gallery
UMnu. Tim Walz, ozancintisa kukhetho lolu esekela uNkosikazi Harris, ukhangelelwe ukwethula umbiko wakho emhlanganweni weDNC ngoLwesithathu ntambama eChicago ngelanga lesithathu lomhlangano omkhulu oweDemocratic National Convention.
Kucele lebandla leRepublican Party, uMnu Trump uqhubekela phambili ekhankasela ukhetho oluzayo. Utshele abantu ukuba uzanqoba uHarris kukhetho oluzayo.
Ekhuluma esemkhankasweni eMichigan uMnu Trump wethembise ukuthi uzakwenza ukuba iMelika ibe yindawo evikelekileyo.
Election 2024 Trump
EleMelika lizaqhuba ukhetho lokudinga umongameli ngoLwezi kulabanye abathi zindala zombili njengoba kungakaveli sobala ukuba ngubani ozanqoba phakathi kuka Trump loHarris. Ucwaningo luveza ukuthi akukacaci ukuthi ngubani ozanqoba laloba uHarris ekhokhela ngama-points ambalwa.
Okunengi Ngaloludaba: Udaba esilwethulelwa nguTaboka Ncube