Umphathintambo wezemali, uMnu Tendai Biti ngollweSithathu wethule uluhlu lwemali ezasetshenziswa nguhulumende ngomnyaka ka2010, ibudget ye US$ 2.25 billion.
Kodwa uBiti uthe uhulumende uzakwenelisa ukubuthanisa imali engange US$1.44 billion kuphela, okutsho ukuthi uzasala elesikwelede sezigidi ezingamakhulu edlula kancane athoba minwe mibili, US$810 million emalini azayisebenzisa enhlelweni ezitshiyeneyo.
U Biti wethule ibudget yakhe le edale lephalamende wathembisa ukuthi uhulumende uzasebenza gadalala aqhube inhlelo ezitshiyeneyo eziphathelane lokuthuthukisa impilo kazulu weZimbabwe.
Wengeze wathi umnotho welizwe uzathuthuka nge 7 percent ngomnyaka ozayo, esithi ukhangelele ukuthi kulungisiswe imigwaqo njalo uzulu weZimbabwe atholiswe amanzi ahlanzekileyo.
EleZimbabwe like labhekana lobunzima obukhulu kwezenotho eminyakeni edluleyo ngenxa yengxabangxoza ebikhona kwezombusazwe. I inflation yona ibiku 213 million percent nyakenye, kodwa uBiti uthe ukhangelele ukuthi ibisiku 5.1 percent kuphela.
Ingcwethi ecubungula ezombusazwe, uMnu Mandlenkosi Gatsheni utshayele uMnu Biti ihlombe ngokusebenza gadalala emizameni yokuvuselela umnotho welizwe.
Kodwa uGatsheni usole ibudget kaBiti kungxoxo ayenze loNtungamili Nkomo weStudio 7 esithi wehlulekile ukulungisisa okunenginengi uzulu weZimbabwe ekade ekhangelele ukuthi kulungisiswe.