Owake waba ngumsekeli kaMayor wakoBulawayo, obhubhe NgoLwesihlanu olwedluleyo, uAlderman Amen Mpofu ubekwe Ngolwesibili, emathuneni aweLady Stanley, asedolobheni leli.
Inengi labakade bezovalelisana lomuyi lincome imisebenzi yakhe lisithi wayengumkhokheli owayekhathalela uzulu wakoBulawayo lentuthuko yedolobho leli.
Emngcwabeni kaAlderman Amen Mpofu
Umuyi uAlderman Mpofu ubhubhe eseleminyaka engamatshumi ayisithupha lasikhombisa-67, esibhedlela seMpilo ngemva kokukhulelwa ngumkhuhlane wezinso. Ubeselesikhathi eside esebenza kukhansili yakoBulawayo ekubandla le MDC Alliance elilunga le Bulawayo Provincial Committee.
Umgcinisihlalo wekomiti yabasebenza okwesikhathi esithe bengamakhansila akoBulawayo, eyaboAlderman, umnumzana Phineus Ndlovu uchasisa ukuba uMpofu wayengumuntu onjani.
“Umuzi kaAmen ubungumuzi wabantu. Ubengumuntu othanda umbuthano, engahlalahla ubone sebize abantu elungise ukudla. Lazonezo ezombangazwe bezisenzela endlini yakhe ngoba ubekhululekile. Kubuye ekhansilini ubengumavula kuvaliwe, wayekhuluma intando yakhe. Engathi lokhu kakufuni ubengakufuni, nxa ungaphikelela lingazwanani ngakho uzakudingela amanxusa umbono wakho bawudilize ucine ungekho.”
Umnumzana Deli Ndlovu u Alderman we Nkulumane uthi uMpofu ubemele iqiniso engavumeli inkohlakalo.
“Yindoda ebithanda idolobho lako Bulawayo, ebifisa ukuthi idolobho lako Bulawayo lithuthukiswe. Yindoda ebithanda iqiniso, ebusithi izinto zamanga kazifuni. Ubengakhekhelezi umuntu kumbe amnyeye, bethi nxa esola ahle atsho ukuthi lokhu ngiyakusola, atsho lakuma Council meeting nxa kukhona okubi atsho ukuthi le yi corruptions asiyilwiseni”
Unkosazana Thabitha Khumalo uthi ibandla leMDC Alliance lilahlekelwe ngokubhubha kukaMpofu.
“Thina njengebandla le MDC Alliance elikhokhelwa ngubaba uNelson Chamisa sithi silahlekelwe kakhulu. Ubaba uAmen wayeqonde njengomgwaqo uSolobhono. Ubaba uMpofu nguye owaqala i residents association e Saucerstown. Besingasweli amanzi uAmen ekhona lamuhla amanzi lamagetsi ayahamba ngoba uAmen engasekho kukhansili.”
Umnumzana Ephraim Ncube omunye njalo wabo alderman ukhala ngokuthi akula nzuzo abayitholayo kukhansili yakoBulawayo.
“I pension esilazo yizo zonezo eze industry lapha engake ngasebenza khona. Khathesi ngihlezi angila plan, lokuthi i surviving yami vele inzima. Abantwabami bathwele nzima, ngoba sidla nzima konke le rent ngiyithola nzima. Besisithi engxenye kungangena ama khansila amatsha kuzake kuguquke izinto kodwa akutshintshi lutho kumbe yikuthi kukoBulawayo asisakwazi kodwa akutshintshi lutho.”
UAlderman Amen Mpofu wakhethwa ukuba ngukhansila ka ward 2 ngomnyaka ka 2003, waphinda njalo wabuyela kuleso sihlalo ngo 2008 kusiya ku 2013.
Emngcwabeni kaAlderman Amen Mpofu
Ubemele ikhansili kunhlangothi ezehlukeneyo ezigoqela i Local Authorities Pension Fund Board of Trustees ngo2003 kusiya ku2004, iBulawayo Metropolitan Province Development Committee ngo2008 kusiya ku2009, iUrban Councils Association of Zimbabwe Committee ngo2008 kusiya ku2009, iBulawayo Twinning Committee ngo2008 kusiya ku2009, kanye le Zimbabwe Urban Council Workers Union ngo2008 kusiya ku2009.
Wakhethwa ukuba ngu Alderman ngomnyaka ka 2018. Utshiye abantwana abane.
Emngcwabeni kaAlderman Amen Mpofu
Inkonzo yokucina yokuvalelisana lomuyi yenzelwe eAmphitheater, iqoqwe ngabekhansili yakoBulawayo bendawonye labeMDC Alliance. Ngemva kwalokhu wasesiyabekwa emathuneni aweLady Stanley Cemetery.
Ngenyanga kaMabasa umuyi waxoxa lentatheli zomsakazo oweCITE lapho aveza khona ukuba ulwisana lomkhuhlane wezinso njalo lokuthi useleminyaka elomkhuhlane njalo wetshukela.
Your browser doesn’t support HTML5
Udaba lokubekwa kuka Alderman Amen Mpofu siluphiwa nguBathabile Masuku