Omunye wabadume ngokulwela amalungelo oluntu uMnu. Patson Dzamara kasekho.
U-Dzamara ubhubhe ngoLwesithathu ekuseni, eHarare, ngemva kokukhulelwa ngumkhuhlane wemvukuzane yemathunjini. Amazwi endunduzo agcwele enkundleni zokuxhumana esuka ebantwini benhlangothi ezehlukeneyo zempilo, phakathi eZimbabwe laphandle kwelizwe.
UPatson ngumfowabo ka Itai Dzamara intathelizindaba eyanyamalala ngomnyaka ka 2015 ngemva kokukhankasela ukuba owayengu Mongameli uMnu Robert Mugabe asuke esikhundleni.
Inengi labantu elizweni lithi okubadanisa kakhulu yikuba ubhubhe lokhe engakabikwazi ukuba kuyini okwehlela umfowabo uItai owanyamalala eminyakeni emihlanu edluleyo.
Omunye owasebenza lo mfowabo ka Dzamara u Itai ndawonye laye uPatson, uMnu Charles Nyoni umchaze njengomuntu owayezimisele ukulwela ilungelo loluntu.
“Lilanga elibuhlungu kakhulu sithole umbiko wokuthi sitshiywe ngomunye esasisebenza laye uDr Patson Dzamara. Kuyinto ebuhlungu kakhulu ukutshiywa ngumuntu omncane kangaka. Siyazi ukuba wangena kwezombusazwe ngemva kokulahlekelwa ngu mfowabo u Itai Dzamra owangena kwezombusazwe wasetshabalala”
Omunye owabotshwa ndawonye lo Patson ngo 2016, uPride Mkono uthe kuyadanisa ukuba imuli yako Dzamara ibe isikhangelele ku Patson ukuba agcine abantwana baka Itai osele minyaka emihlanu engaziwa ukuba usaphila loba hatshi.
“Ukufa kuka Patson Dzamara yinto esizwise ubuhlungu kakhulu thina esilwela amalungelo oluntu. Kuba buhlungu singakhangela ukuba ufe engakatholi ukuba umfowabo u Itai Dzamara wayangaphi. Lokhu sokutshiya abantwana baka Itai bezintandane ngoba ube esengu baba wabo”
Umsekeli wesikhulumeli se MDC Alliance uMnu Felix Mafa uthe uDzamara wayelilunga lebandla leli elalizimisele ngomsebenzi walo okubonakale ngendlela abantu abancedise ngayo ngesikhathi egula.
“Besekulabantu akade sebekhiphe imali efika $1400 besithi kayehlinzwa. Imali isibuyile eyoluthi ayenhlizwe uhle wasitshiya. Okusidanisayo yikuba ungu Mnewabo ka Dzamara lowo owasitshiyayo. Kubuhlungu kubandla le MDC Alliance ngoba ube eye National Executive member”
Omela inhlanganiso ye Citizens Manifesto uMnu Ashely Pfunye yena uthe uDzamara utshiye isifundo kwabatsha abalwela ilungelo loluntu.
“Sehlelwe liyezi elimnyama ngoba silahlekelwe ngu mfowethu ebe sihamba sonke. Kubuhlungu kakhulu ngoba uPatson usitshiye singakatholi impendulo zokuba kuyini okwenzakala kumnewabo uItai Dzamara”
UDzamara ube eseleminyaka engamatshumi amathathu lane eyokuzalwa, engakathathi. Imuli yako Dzamara ayikazisi uzulu ukuba umsebenzi wokubekwa kwakhe uzaqhutshwa njani kodwa abantu babuthene ngakibo emzini weGlenview.
Your browser doesn’t support HTML5
Udaba lwemfa kaPatson Dzamara siluphiwa nguMlondolozi Ndlovu