Umongameli Emmerson Mnangagwa ukhuthaze iziphathamandla zebandla le MDC-T ukuthi zimanyane, zingalwisani, kulandela ukubhubha komkhokheli walelibandla uMnu. Morgan Tsvangirai.
Ekhuluma esililweni sikaMnu. Tsvangiria emzini kamuyi eHarare lapho isidumbu sakhe esilaliswe khona. uMnu. Mnangagwa uthembise ukuthi uhulumende wakhe uzabhadala isikwelede esitshiywe ngumuyi esibhedlela abeselatshwa kuso kweSouth Africa.
Wengezelele wathi uzaqhubeka encedisa imuli ngendleko zemali kanye lokokusetshenziswa, aze ayengcwatshwa ngoLwesibili umuyi ngakibo eBuhera.
UMnu. Mnangagwa ubekhatshwe yiziphathamandla zebandla lakhe.
UMnu. Prince Dubeko Sibanda, isiphathamandla sebandla leMDC-T, obesembuthanweni lo, uthi bayakuncoma okwenziwa nguhulumende lanxa bekuyimfanelo yakhe uMnu. Tsvangirai njengoba wake waba yinhloko kahulumende aze amanyane.
Uthe iziphathamandla zebandla leMDC-T bezikhona zonke njalo kakho oke waxotshwa kulumbuthano, njengalokho abakuzwe emsakazweni weZBC kuthiwa kukhulunywe ngunina kamuyi.
Your browser doesn’t support HTML5
Ingxoxo LoMnu. Prince Dubeko Sibanda
Phambilini kwamazwi kamongameli Mnangagwa, isidumbu sikaMnu. Tsvangirai sisuswe enkambeni yamasotsha eCommando Barracks eHarare ngeSonto ekuseni, lapho ebisilaliswe khona sivela kwele South Africa ngoMgqibelo. Sidluliselwe emahofisi eMDC-T eHarvest House lapho abasekeli balelibandla abasihlangabeze khona, befola ngemigwaqo.
Abasekeli beMDC-T bafole ngemigwaqo behlabela ingoma zebandla labo lanxa abanye belahleke baya eRobert Mugabe Square ebizwa ngokuthi yi Freedom Square.
Abantu bacine bebuthana emahofisini amakhulu aleli bandla eHarvest House, ngenhloso yokuvalelisa uMnu. Tsvangirai.Osakhulayo u Mnu. Sifelani Moyo uthi ibandla lilahlekelwe liqhawe elalingelankethabetshabi.
Umgcinisihlalo webandla kusabelo se Harare engumeli kudale lephalamende uMnumzana Eric Marava uthi ibandla lakhe lenelise ukubuthanisa abantu njalo abanye bazibuyele bodwa kungela nkinga njalo kungela kwesaba amapholisa njengobesokuvame ukwenzakala.
Kube lokuhlabela ingoma ezitshengisa usekelo kuMnumzana Nelson Chamisa.
Umfundisi Rodgers Chekwa obekulumbuthano uthi abantu balahlekelwe liqhawe njalo lanxa kulokulwisana ebandleni, kusobala ukuthi uMnu. Chamisa ulosekelo.
Uthi udaba lokungezwani lulula kakhulu njalo ubona inkokheli kuleli bandla zilakho ukuhlala phansi zilulungise. Osakhulayo uMnu. Brian Sibanda uncome ukubambana kwabantu ngokuthula kanye losekelo lwabo.
U Marawa uthi umbuthano omkhulu uzakuba ngowe rally e Robert Mugabe square e Harare ngoMvulo lapho abantu abazavalelisana lomuyi ngobunengi babo andubana isidumbu sakhe sidluliselwe e Buhera lapho esizangcwatshwa khona ngoLwesibili.Ngemva kwalokhu kube lokujabula abantu begida bemanyene.
Your browser doesn’t support HTML5
UMark Peter Nthambe Uyalandisa