Kuqhamuke udlakela ngempelasonto edolobheni lakoBulawayo lapho okubikwa kulwisane intsha yebandla leMDC-T phambilini komhlangano obukhokhelwa ngumongameli webandla uMnu. Morgan Tsvangirai ekhuthaza uzulu ukuthi engangeni kukhetho lwama by elections ngenyanga kaNhlangula.
Kodwa isikhulumeli sikaMnu. Tsvangirai, uMnu. Luke Tamborinyoka ulandule ukuthi kube lobudlwangudlwangu esithi imihlangano kaTsvangirai iqhutshwe ngokuthula.
Abazi ngokwenzakeleyo batshele iStudio Seven ukuthi ngempela kulokufuthelana kulelibandla ngenyathelo lokungangeni kukhetho lwama by elections abanye besithi lokhu kufana lokupha ibandla le ZANU PF izihlalo ngokungangeni kulokukhetho.
Idolobho lakoBulawayo liphakathi kodubo lokungezwani kulandela ukumiswa ukuba ngumgcinisihlalo okwenziwa uMnu. Gift Banda ngumthethwandaba we High Court ngemva kokuba uMnu. Matson Hlalo ekhweze loludaba esithi uBanda kamelanga abengumgcinisihlalo ngoba engelaminyaka emihlanu esebandleni njengalokhu okunqunywa yisisekelo sombuso webandla.
UNkosazana Dorcas Sibanda owayekhethwe ukuba ngumgcinisihlalo loludaba lusalungisiswa laye sewaxotshwa kulesi isikhundla.
Kubudlwangudlwangu obuqhamuke ngempelansonto kubikwa kulimale abantu abambalwa. Isikhulumeli samapholisa ko Bulawayo, uMnu. Mandlenkosi Moyo walile ukukhuluma le Studio Seven ngaloludaba.
Umsekeli kaMnu. Tsvangirai uNkosazana Khuphe laye ubengatholakali kumakhalekkhukwini wakhe.
UMnu. Tamborinyoka utshele iStudio Seven ukuthi ngamanga ukuthi kuqhamuke udlakela emhlanganweni ka Tsvangirai esithi kube lokuthula uTsvangirai wenelisa ukwethulela uzulu izizatho zokungangeni kukhetho nxa kungaguqulwanga imithetho.
Kodwa umgcinisihlalo wenhlanganiso yabalwa impi yekululeko abakubandla le MDC-T, uMnu. Swithun Chirowodza utshele uChris Gande weStudio Seven ukuthi mpela kuqhamuke udlakela emhlanganweni ka Tsvangirai.
Your browser doesn’t support HTML5
Ingxoxo LoMnu. Swithurn Chirowodza
Ekhuluma emhlanganweni eJimila eTsholotsho North lapho okuncintisana khona usikhwicamfundo Jonathan Moyo webandla leZANU PF kanye loMnu. Busani Ncube loNkosikazi Getrude Sibanda abancintisa bezimele, uMnu. Tsvangirai ubikwa ekhuthaze abasekeli bakhe ukuthi bengayivota kulolukhetho uhulumende engakaguquli imithetho ephathelane lokhetho.
Uthe kusobala ukuthi uMnu. Moyo uzanqoba ngenxa yokuqilibezela kwebandla leZANU PF, okugoqela ukuthenga amavoti ngokusungula inhlelo lokupha abantu ukudla ngesikhathi sokhetho, kanye lokuletha abantu abavela ngaphandle kwalesi isigaba ukuthi bezovota.
Kodwa uMnu. Busani Ncube, ugcizelele kungxoxo loSithandekile Mhlanga weStudio 7 ukuthi usebenza lebandla leMDC-T njalo ukhuthaza abantu ukuthi bemvotele.
Your browser doesn’t support HTML5
Ingxoxo LoMnu. Busani Ncube