Umkhokheli weMDC-T uMnu Morgan Tsvangirai uhlangane lemuli kamuyi uMnu Thamsanqa Mahlangu ngoLwesibili bekhulumisana ngokulwisana okubekhona emulini kaMahlangu emngcwabeni wakhe ngoMgqibelo.
Ukulwisana lokhu kubangele uTsvangirai leziphathamandla zebandla lakhe bangayi emngcwabeni kaMahlangu, yena obengummeli weNkulumane edale lephalamende.
Amalunga eMDC-T, agoqela iziphathamandla ezingathandanga ukuqanjwa ngamagama ngoba esesaba ukuhlukuluzwa, asole uTsvangirai labanye bakhe esithi bayangisile kakhulu.
Kodwa uTsvangirai uzivikele ekhuluma leStudio 7 esithi kabahambanga ukuyangcwaba uMahlangu ngenxa yokulwisana obekukhona emulini yakhe.
Your browser doesn’t support HTML5
Amazwi kaTsvangirai
"Njengebandla sathatha isinqumo sokuthi sizalandela esikutshelwa yimuli yakhe, kodwa behluleka ukuvumelana ekuthini umngcwabo uhanjiswe njani," kutsho uTsvangirai.
"Ngalokho sabona kuqondile ukuthi singaphatheki. Bakhona abathi kwakumele sihambe kuphela, kodwa sasingakwenza njani lokhu imuli isilwa? Emasikweni ethu umuntu ungcwatshwa ngumdeni wakhe, hatshi libandla lezombusazwe," uqhubeke etsho.
Abanye bathi lanxa bekulokudonselana emulini kaMnu Mahlangu, okwenziwe yiMDC-T lakho kuveza ukusilela kobukhokheli obuqotho lokulwisana okukhona kulelibandla.
Kodwa umgcinisihlalo webandla uMnu Lovemore Moyo ukulandule lokhu.
"Angikwazi ukuthi ukudonselana kuyabe kuvela ngaphi ngoba njengenhlanganiso sisebenza ndawonye lanxa sisehlukana lapho esimele sehlukane khona ngembono. Kodwa lokhu akutsho ukuthi kulokudonselana," kuchasise uMoyo.
Your browser doesn’t support HTML5
Ingxoxo loMnu Lovemore Moyo