UMongameli Donald Trump ulwisana lamalunga edale leCongress amane athi kumele abuyele lapho adabuka khona nxa engathakazeleli akwenzayo kwele Melika.
UTrump uqale ngempelaviki ukuthuka amalunga edale leCongress agoqela uIlhan Omar, uAlexandria Ocasio-Cortez, Ayana Pressley loRashida Tlaib. Uthi abane laba bazonda ilizwe leMelika lele Israel njalo bathakazelela amalwecatsha.
Amalunga edale leCongress uRep. Rashida Tlaib, D-Mich., Rep. Ilhan Omar, D-Minn., Rep. Alexandria Ocasio-Cortez, D-N.Y., loRep. Ayanna Pressley.
“Nxa ngisizwa indlela abakhuluma ngayo ngelizwe lethu, nxa ngisizwa bekhuluma kubi ngelizwe leIsrael njalo langendlela abathanda ngayo amalwecatsha awe Alqaeda, ngifisa ukulitshela ukuthi lokhu kubi ikakhulu kubandla lama Democrats.”
UTrump uthi kumele baphume baphele kwele Melika nxa bengathakazeleli akwenzayo lakukhulumayo.
“Nxa uzonda ilizwe lethu, nxa ungathakazeleli ilizwe leli, ulakho ukuthi uhambe lapho ofuna khona.”
UTrump uphinde wachothoza konke okwenziwa nguNkosikazi Nancy Pelosi, umkhokheli wedale leHouse of Representatives okubandla lama Democrats. Uthi okwamanje uPelosi uxabana labane laba edale leli abangafuni kulalela okufunwa libandla lama Democrats. Kodwa uPelosi uthi inkulumo kaTrump iphehla inkethabetshabi.
Omunye wabo, u-Ilhan Omar uvumelana loPelosi esithi uTrump uveza ukuthi ungumuntu okhuthaza inkethabetshabi.
“Ufuna ukuthi ukwehlukanisa abantu ngobuhlobo, ezokholo njalo langokuthi abantu badabunga kuphi. Wenza lokhu ngoba uyabona ukuthi angasehlukanisa sonke ngokukhuluma ngalokhu ukwenzela ukuthi singasebenzi ndawonye.”
UMnu. Den Moyo, odabuka kwele Zimbabwe olandela ezombangazwe kwele Melika, uthi uTrump ukhuluma konke lokhu ukwenzela ukuthi adinge usekelo lukazulu njengoba sokulungiselelwa ukhetho oluzakwenziwa ngomnyaka ka2020.
Okwamanje idale leHouse of Representatives lifuna ukuthatha isinqumo sokuthi kukhuzwe uTrump ngakwethule ebulenjini bokuxhumana obeTwitter njalo lakukhulumileyo ngabane laba abakudale leli. Akwaziwa ukuthi ibandla lama Republicans lizakusekela lokhu.
Your browser doesn’t support HTML5
Udaba Esilethulelwe NguGibbs Dube