Umkhokheli wesonto yeRoma uPope Francis ukhulume phambi kwamalunga edale leCongress yeMelika ngoLwesine wakhuthaza amalunga alelidale ukuthi asebenzelane ndawonye emizameni yokuqela ubuyanga.
Inkulungwane zabantu zibuthene phambi kweCongress ukuzekuzwa amazwi kaPapa yena okhuthaze njalo ukuthandana lokubambana emhlabeni jikelele.
Uthe ubuyanga yinto ephazamisa impilo zabanengi. Ngalokho, ukhuthaze labo abatholayo ukuthi bancedise abayanga kanye labaswelayo.
Olunye udaba olumqoka aluphetheyo ngolokuguquka komkhathi ngezizatho ezitshiyeneyo ezenziwa ngabantu.
UPapa uthe kulobufakazi obugcweleyo bokuthi umkhathi uyaguquka njalo uguquka ngendlela ezingalungelanga impilakahle kazulu.
Ngalokho, uthe kungumlandu wawo wonke amazwe lozulu, okugoqela idale leCongress, ukuthatha amanyathelo okulwisana lenguquko le.
UPapa uphinde wasola izimpi ezigoqela impi yeSyria esibangele ukuthi izigidi zabantu zibaleke kulelilizwe lamanye ziyephephela emazweni ase Eastern Europe.
Uxwayise amazwe athengisela abahlamuki emazweni atshiyeneyo ukuthi betshiyane lalumkhuba ngoba izikhali yizo eziphehla izimpi.
Ekhuluma ngodaba lwabantu bokuza, uPapa uthe ungomunye wabantu abalabazali abamthola beselizweni elingayisilo labo.
Ngalopkho uthe abantu kumele babe lesineke ebantwini bokuza bengaze baba lobandlululo.
Esuka edale leCongress uPapa uhambe wayahlangana labantu abaswelayo abangelandawo zokuhlala amahomeless.
Uzasuka eWashington elubhekise edolobheni elikhulu leNew York lapho azakhuluma khona emhlanganweni weUNited Nations General Assembly ngoLwesihlanu.
Esuka eNew York uzakuya ePhiladelphia lapho azakhuluma emhlanganweni wamaCatholics ongenwe zinkulungwane zabantu ezigoqela izizalwane zeZimbabwe ngiMgqibelo.
Your browser doesn’t support HTML5
Udaba Lusethulwa nguNtungamili Nkomo