Owayengumongameli wakwele South Africa, uMnu. Thabo Mbeki, uthi kumele abantu bakwele Zimbabwe basebenze ndawonye ukwenzela ukuthi kuvuselelwe umnotho welizwe.
UMbeki wethule lokhu namuhla ngesikhathi ekhuluma lentathelizindaba eHarare esanda kuhlangana leyinye inkhokheli yamabandla aphikisayo akumanyano wePolitical Actors Dialogue (POLAD) ekhokhelwa nguMongameli Emmerson Mnangagwa, ozama ukulungisa umnotho obhidlikayo lokunye okuhluphayo eZimbabwe.
Abanye ahlangane labo namuhla bagoqela uNkosikazi Thokozani Khupe okhokhela ibandla leMDC-T, uMnu. Lovemore Madhuku okubandla leNational Constitutional Assembly labanye abakumanyano wePOLAD. UMbeki wenze umhlangano ofanayo izolo loMongameli Emmerson Mnangagwa loMnu. Nelson Chamisa, okhokhela ibandla leMDC.
Akwaziwa ukuthi uMbeki uthunywe ngubani eZimbabwe lobanje abanye becabangela ukuthi usekelwa nguMongameli Cyril Ramaphosa wakwele South Africa kanye lomanyano weSouthern African Development Community (SADC). Kasenelisanga ukukhuluma ngodaba lolu leziphathamandla zakwele South Africa kanye lomanyano weSADC.
UMnangagwa uthi wayevele emelele uMbeki ukuthi ethekelele eleZimbabwe kulandela ukugcotshwa kwakhe ukuba ngumongameli ngomnyaka ophelileyo. UMbeki uphinde wakhuthaza amabandla aphikisayo ukuthi ahloniphe impumela yokhetho olwenziwe nyakenye.
Impumela yokhetho lolu yaphikiswa nguChamisa lebandla lakhe besithi uMnangagwa kanqobanga ngemfanelo ngakho kabamboni njengomongameli weZimbabwe. Ibandla leMDC elikhokhelwa nguChamisa lithi kunengi okukhulunywe ngumkhokheli walo loMnangagwa okugoqela impumela yokhetho likamongameli.
UDokotela Nkululeko Sibanda, isikhulumeli sikaMnu. Chamisa utshele uGibbs Dube weStudio 7 ukuthi kumele kukhulunywe kabanzi ngempumela yokhetho nxa kumele kulungiswe konke okuhluphayo eZimbabwe.
Your browser doesn’t support HTML5
Ingxoxo Esiyenze LoDokotela Nkululeko Sibanda
Ukuze sizwe imibono yebandla elibusayo, sixoxe loMnu. Malaki Nkomo, owake wamela isiqinti seInsiza South edale lephalamende ekubandla leZanu PF, othi kumele ibandla leMDC livume ukuthi lanqotshwa kukhetho olwenziwa nyakenye kungakenziwa inkulumo loMnangagwa.
Your browser doesn’t support HTML5
Ingxoxo Esiyenze LoMnu. Malaki Nkomo