Izizalwane zeZimbabwe kwele South Africa sezethule ukukhathazeka okukhulu ngokulahlekelwa yimisebenzi ngemva kwamalanga angamatshumi amabili lanye amankampani evaliwe ngenxa yecoronavirus.
Sekuphele amaviki amabili amankampani amanengi evalwe ngci inengi lezizalwane zeZimbabwe zivalelwe ezindlini kwele South Africa ngenxa yecoronavirus.
Sekulokwesabela ukuthi kuyathi kuphela insuku ezingamatshumi amabili lanye ngolweSine weviki ezayo inengi selilahlekelwe yimisebenzi.
Isizalwane seZimbabwe, Greatman Mkhwebu, ukhuthaza izizalwane zeZimbabwe ukuthi ziqale ukukhanda amanye amacebo okuziphilisa ngaphandle kokuqhatshwa. Uthi isikhathi sokwesaba ukuhlekwa sesedlule.
“Ngiyathanda nje ukuba nguthekwane ngiyelapha emedampini okulahlwa khona izinto lezinye nje ezilahlwa ngabelungu. Ingaba yinsimbi, planka, iziqephu zamathayili lokunye nje engibona ngikuthandile besengikuvuselela mhlawumbe ngokukhalipha okuthile kube kutsha. Yinto nje engiyenzayo sonke lesisikhathi. Mhla uphelelwe ngumsebenzi wazi ukuthi ngezandla zami lezi ngingaphila musi.”
UMnu. Moketsi Nkomo uthi sekusegcekeni ukuthi amanye amankampani azahle afadalale ngemva kwalezi insuku ezingamatshumi amabili lanye evaliwe.
“Ma isiyaphela i21days leyi amacompanies amanengi azabe engayenzanga mali okungasenza sithole futhi abanye abantu abanengi bakithi bephelelwa yimisebenzi ngoba amacompanies kumbe okanye abelungu bengela mali zokubabhadala. Abantwana ekhaya ma ungaholanga abalakudla wena awulamali yerenti khonala egoli.”
LoMnu. Richard Moyo uthi vele useqalile ukuzilungiselela.
“Nami ngiyathatha amakhabothi kakhulu la ngasemalokishini bese ngiyakhona ukukulungisa ngikulungise besengiyakuthengisa ke konke nje lezivalo lezi amadoor frame ngenza njalo nje. Sengifunde kakhulu hayi angisalali ngendlala uthole okungamasentinyana uziphilise ungadiphendi ekusebenzeni.”
UMnu. Kolema Moyo, odabuka ePlumtree eNyabane koMqanjelwa, uthi liphutha elikhulu kakhulu ukuthi umuntu athembele ekuthini uzaqatshwa ukuze uphile.
“Asikesifundeni nje ukuthi sibe lomsebenzi wezandla obalulekileyo. Singasweli amaplans okuziphilisa lomsebenzi uphele ucine lempilo yakho ungasakwazi ukuthi wenzani ngayo ngenxa yokuthi wena ububhekelele imali ephuma emlungwini. Siyaphila ngaphandle kokusebenza sihola. Ukubhekabheka sicosha cosha okunye izinto sidobha dobha ukuthi sikwazi ukuthi sikhavise kwezinye indawo.”
Amankampani athengisa impahla abalisa iEdgars asehle ememezela ukuthi kungenzeka ehluleke ukuvula. Indawo zokudlela lezokuhlala izethekeli lapho okusebenza khona abeZimbabwe abanengi akulaqiniso ukuthi zizavula zisebenze kuhle na njengoba leligciwane lizabe lilokhu lisidlubhedu ngeviki ezayo.
Abaphila ngokuthengisa ezitaladeni labo kukhanya bezaba lohlupho njengoba abantu sebesesaba ukuthenga ukudla okungavikelwanga. Inengi labasebenza ezindlini bebevele sebemisiwe ngesikhathi abantu bevalelwa ezindlini ngoba abelungu besithi bayesaba ukuthi bazabaphathela leli gciwane emitshoveni abahamba ngayo.